អ្នកនាំពាក្យសាលារាជធានីភ្នំពេញ បានអះអាងថា សាលារាជធានីភ្នំពេញ គ្រោងផ្ដល់សំណងដល់ប្រជាពលរដ្ឋរងផលប៉ះពាល់ពីការសាងសង់ផ្លូវបេតុងនៅតាមបណ្ដោយផ្លូវរថភ្លើង ចាប់ពីគីឡូម៉ែត្រលេខ ៦ ទៅដល់បឹងកក់។
ក្រុមប្រជាពលរដ្ឋជាង ១០០នាក់ មកពីសហគមន៍ផ្លូវរថភ្លើង សហគមន៍ប្រឡាយស្ទឹងមានជ័យ និងសហគមន៍បឹងទំពុន កាលពីថ្ងៃម្សិលមិញនេះ បានជួបជុំគ្នាបង្ហាញពីក្ដីបារម្ភរបស់ពួកគេអំពីផលប៉ះពាល់ដែលកើតចេញពីគម្រោងអភិវឌ្ឍន៍នៅក្នុងទីក្រុងភ្នំពេញ ដោយលើកឡើងថា អាជ្ញាធរពុំបានទូទាត់សំណងផលប៉ះពាល់ដល់ពួកគេនោះឡើយ។
អ្នកនាំពាក្យសាលារាជធានីភ្នំពេញ លោក មាន ចាន់យ៉ាដា បានប្រាប់វីអូឌីនៅថ្ងៃនេះថា សាលារាជធានីភ្នំពេញ គ្រោងនឹងផ្ដល់សំណងដល់ពលរដ្ឋដែលរងផលប៉ះពាល់ពីការសង់ផ្លូវបេតុងនៅតាមបណ្ដោយផ្លូវរថភ្លើង ចាប់ពីគីឡូម៉ែត្រលេខ ៦ ទៅដល់បឹងកក់។
សម្រាប់សហគមន៍ប្រឡាយស្ទឹងមានជ័យ និងសហគមន៍បឹងទំពុន អ្នកនាំពាក្យរូបនេះបញ្ជាក់ថា សាលារាជធានីធ្លាប់បានជជែកជាច្រើនលើកជាមួយតំណាងសហគមន៍អំពីផលប៉ះពាល់ និងសំណងរួចហើយ។ ទោះជាយ៉ាងណា លោកបានអំពាវនាវដល់ប្រជាពលរដ្ឋឲ្យពិភាក្សាជាមួយសាលារាជធានីភ្នំពេញ ជាជាងការជួបជុំគ្នាតវ៉ា៕
