ស្ត្រីពីរនាក់ ដែលម្នាក់ជាជនជាតិវៀតណាម និងម្នាក់ទៀតជាជនជាតិឥណ្ឌូនេស៊ី ត្រូវបានតុលាការម៉ាឡេស៊ីចោទប្រកាន់ថា ពាក់ព័ន្ធករណីសម្លាប់លោក គីម ជុងណាម បងប្រុសម្តាយផ្សេងគ្នាជាមួយលោក គីម ជុង អ៊ុន កាលពីថ្ងៃទី១៣ ខែកុម្ភៈ។
តាមការចុះផ្សាយរបស់សារព័ត៌មាន BBC បានឲ្យដឹងថា ស្ត្រីទាំងពីរនោះគឺម្នាក់ឈ្មោះ Doan Thi Huongជាជនជាតិវៀតណាម និងម្នាក់ទៀតឈ្មោះ Siti Aisyah ជាជនជាតិឥណ្ឌូនេស៊ី រងការចោទថា យកសារធាតុពុល VX ប៉ាតលើមុខលោក គីម ជុងណាម នៅក្នុងព្រលានយន្តហោះម៉ាឡេស៊ី ហើយបានបណ្តាលឲ្យលោក គីម ជុងណាម ស្លាប់។
តាមច្បាប់របស់ម៉ាឡេស៊ី ករណីសម្លាប់នេះ ស្ត្រីទាំងពីររូបអាចនឹងត្រូវទទួលទោសដល់ថ្នាក់ប្រហារជីវិត ខណៈជនសង្ស័យមួយចំនួនទៀតសមត្ថកិច្ចម៉ាឡេស៊ីកំពុងបន្តស្វែងរក។
ប្រធានស្ថាប័នអយ្យការរបស់ម៉ាឡេស៊ីលោក Mohamed Apandi Ali ថ្លែងថា មិនទាន់មានការសម្រេចយ៉ាងណា ចំពោះករណីឃាត់កម្មលើជនជាតិកូរ៉េខាងជើងនោះនៅឡើយទេ។ លោកថា ការសម្រេចយ៉ាងណានោះ គឺអាស្រ័យលើលទ្ធផលនៃការស្រាវជ្រាវរបស់នគរបាល។
ចំណែកជនសង្ស័យផ្សេងទៀតក្នុងការសម្លាប់នោះ រួមមានទាំង ឯកអគ្គរដ្ឋទូតរបស់កូរ៉េខាងជើងប្រចាំកូឡាឡាំពួ និង សមាជិកស្ថាប័នអាកាសចរណ៍របស់រដ្ឋ។ ករណីនេះ កូរ៉េខាងត្បូងជឿជាក់ថា ជនសង្ស័យបួននាក់ ត្រូវបានរត់គេចជាចារកម្មរបស់កូរ៉េខាងជើង៕