រដ្ឋាភិបាលវៀតណាមបានចោទថា ករណីចិនហាមការនេសាទនោះ គឺជាផ្នែកមួយនៃការបង្កជម្លោះនៅសមុទ្រចិនខាងត្បូង ដែលរំលោភបំពានលើដែនអធិបតេយ្យភាពរបស់វៀតណាមនិងធ្វើឲ្យបញ្ហាកាន់តែស្មុគស្មាញបន្ថែមខ្លាំងទៀត។
រដ្ឋមន្ត្រីក្រសួងកសិកម្មចិន បានហាមមិនឲ្យអ្នកនេសាទវៀតណាមចូលនេសាទនៅតំបន់ខ្លះថែមទៀត ដែលកំពុងមានជម្លោះរួមមាននៅជិតប្រជុំកោះប៉ារ៉ាសែល ដែលវៀតណាមថាជារបស់ខ្លួន ប៉ុន្តែពេលនេះ ចិនកំពុងគ្រប់គ្រង។
អ្នកនាំពាក្យក្រសួងការបរទេសវៀតណាមលោក Le Hai Binh ចេញសេចក្តីថ្លែងការណ៍នៅថ្ងៃនេះថា វៀតណាមប្រឆាំង និងបំរាមនោះ។ លោកបញ្ជាក់ថា វៀតណាម មានហេតុផលផ្លូវច្បាប់ និង ភស្តុតាងប្រវត្តិសាស្ត្រគ្រប់គ្រាន់បញ្ជាក់ថា ទីនោះជាកម្មសិទ្ធិរបស់វៀតណាម។ នេះបើតាមទីភ្នាក់ងារព័ត៌មានAP។
លោក Le Hai Binh ថ្លែងថា ចិនបានធ្វើសកម្មភាពជា ឯកតោភាគីជាច្រើនដែលបំពានដល់ដែនអធិបតេយ្យភាពវៀតណាម ដែលផ្ទុយពីខ្លឹមសារច្បាប់អន្តរជាតិ៕