មន្ត្រីនគរបាល បានឲ្យដឹងថា មនុស្ស ៣នាក់ ត្រូវបានសម្លាប់ភ្លាមៗនៅនឹងកន្លែងកើតហេតុ នៅព្រឹកថ្ងៃនេះ បន្ទាប់ពីរថយន្តសង្គ្រោះបន្ទាន់មួយ ដែលបើកបរបញ្ច្រាសទិសនោះ បានបុកពួកគេ នៅលើផ្លូវជាតិលេខ ៦អា ស្ថិតក្នុងស្រុកបាធាយ ខេត្តកំពង់ចាម។
អធិការរងនគរបាលស្រុកបាធាយ លោក ស៊ុគ សូល ត្រូវបានវេបសាយនគរបាលជាតិដកស្រង់សម្ដីចុះផ្សាយថា រថយន្តសង្គ្រោះបន្ទាន់មួយគ្រឿង បានបើកបរបញ្ច្រាសទិស មុននឹងបុកម៉ូតូមួយគ្រឿង នៅឃុំបាធាយ ដោយបានសម្លាប់អ្នកដំណើរ ៣នាក់នៅលើម៉ូតូនោះ។
មន្ត្រីនគរបាលរូបនេះបញ្ជាក់ថា អ្នកបើកបររថយន្តសង្គ្រោះបន្ទាន់នោះ បានរត់គេចខ្លួនបាត់ទៅហើយ បន្ទាប់ពីបង្កគ្រោះថ្នាក់សម្លាប់មនុស្សនៅលើដងផ្លូវ។
គ្រោះថ្នាក់ចរាចរណ៍បានសម្លាប់ជីវិតមនុស្សរៀងរាល់ថ្ងៃនៅលើដងផ្លូវ។ របាយការណ៍ចរាចរណ៍ផ្លូវគោកឆ្នាំ២០១៦ បានឲ្យដឹងថា មនុស្សដល់ទៅ ១៧១៧នាក់ ត្រូវបានសម្លាប់ ហើយ ៦៦០៧នាក់ទៀត បានរងរបួសនៅក្នុងគ្រោះថ្នាក់ចរាចរណ៍ទូទាំងប្រទេសកាលពីឆ្នាំមុន៕
