ទីបំផុតទៅ តុលាការបានសម្រេចចេញដីកាឲ្យចាប់ខ្លួនអតីតអភិបាលខេត្តតាកែវ លោក ឡាយ វណ្ណៈ ហើយនៅថ្ងៃនេះ ដែលត្រូវបានសង្ស័យថា មានជាប់ពាក់ព័ន្ធនឹងឃាតកម្មលើស្ត្រីម្នាក់។
ក្នុងដីកាបញ្ជាចេញនៅថ្ងៃនេះ ព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ បានបញ្ជាទៅសមត្ថកិច្ចឲ្យនាំខ្លួនលោក ឡាយ វណ្ណៈ ទៅកាន់នាយកដ្ឋាននគរបាលព្រហ្មទណ្ឌ នៃអគ្គស្នងការនគរបាលជាតិ។
លោក ឡាយ វណ្ណៈ ដែលត្រូវបានលោកនាយករដ្ឋមន្ត្រី ហ៊ុន សែន ដកពីតំណែងជាអភិបាលខេត្តតាកែវកាលពីថ្ងៃទី២៦ ខែមីនានោះ ត្រូវបានសង្ស័យថា មានជាប់ពាក់ព័ន្ធនឹងឃាតកម្មលើសអ្នកស្រី ចេវ សុវឌ្ឍនា ដែលត្រូវបានប្រទះឃើញស្លាប់នៅក្នុងផ្ទះជួលមួយកន្លែងនៅឯក្រុងដូនកែវ ខេត្តតាកែវ កាលពីថ្ងៃទី២៦ ខែមករាកន្លងមក។
សារព័ត៌មាន Fresh News បានចុះផ្សាយថា អតីតអភិបាលខេត្តតាកែវរូបនេះ ត្រូវបានសមត្ថកិច្ចចាប់ខ្លួនហើយនៅម៉ោង ៣កន្លះ រសៀលថ្ងៃនេះ បន្ទាប់ពីពិធីផ្ទេរមុខតំណែងប្រធានគណបក្សប្រជាជនកម្ពុជាខេត្តតាកែវ ទៅឲ្យអភិបាលខេត្តតាកែវថ្មី។
លោក ឡាយ វណ្ណៈ ត្រូវបានសង្ស័យថា មានជាប់ពាក់ព័ន្ធនឹងឃាតកម្មលើស្ត្រីខាងលើ បន្ទាប់ពីបងប្រុសរបស់លោក គឺ លោក ឡាយ ណារិទ្ធ ដែលជាស្នងការរងនគរបាលខេត្តតាកែវផងនោះ និងមនុស្ស ៣នាក់ទៀត ត្រូវបានសមត្ថកិច្ចក្រសួងមហាផ្ទៃ ចាប់ខ្លួន និងបញ្ជូនទៅស៊ើបសួរនៅសាលាដំបូងរាជធានីភ្នំពេញកាលពីថ្ងៃម្សិលមិញនេះ។
អតីតអភិបាលខេត្តតាកែវរូបនេះ បានបដិសេធនៅលើទំព័រហ្វេសប៊ុករបស់លោកថា លោក និងបងប្រុសរបស់លោក មិនបានសម្លាប់អ្នកស្រី ចេវ សុវឌ្ឍនា ឡើយ ប៉ុន្តែ បានសារភាពថា លោកមានទំនាក់ទំនងស្នេហាជាមួយស្ត្រីរូបនេះអស់រយៈពេល ១ឆ្នាំមកហើយ។
អ្នកស្រី ចេវ សុវឌ្ឍនា អាយុ ៣៦ឆ្នាំ ត្រូវបានប្រទះឃើញស្លាប់នៅក្នុងផ្ទះជួលនៅឯក្រុងដូនកែវ កាលពីថ្ងៃទី២៦ ខែមករា ហើយរបាយការណ៍នគរបាលខេត្តតាកែវ សន្និដ្ឋានកាលពីដំបូងថា ស្ត្រីរូបនេះបានចងកសម្លាប់ខ្លួន៕
