លោកនាយករដ្ឋមន្ត្រី ហ៊ុន សែន បានប្រកាសនៅថ្ងៃនេះថា ប្រជាពលរដ្ឋ នឹងធ្វើដំណើរដោយឥតគិតថ្លៃតាមរថយន្តក្រុងសាធារណៈទៅតាមបណ្ដាខេត្តមួយចំនួន នៅអំឡុងពិធីបុណ្យចូលឆ្នាំថ្មីខាងមុខនេះ។
នៅលើទំព័រហ្វេសប៊ុកផ្លូវការរបស់លោក លោកនាយករដ្ឋមន្ត្រី ហ៊ុន សែន បានរៀបរាប់ថា ប្រជាពលរដ្ឋអាចជិះរថយន្តក្រុងដោយមិនបង់លុយ នៅក្នុងរាជធានីភ្នំពេញ អំឡុងពិធីបុណ្យចូលឆ្នាំថ្មី ចន្លោះពីថ្ងៃទី១២ ដល់ថ្ងៃទី១៨ ខែមេសាខាងមុខនេះ ។
ជាងនេះទៅទៀត លោក ហ៊ុន សែន បានរៀបរាប់បន្តថា ប្រជាពលរដ្ឋក៏អាចជិះរថយន្តក្រុងសាធារណៈពីរាជធានីភ្នំពេញ ទៅកាន់ខេត្តនានាស្ថិតនៅតាមផ្លូវជាតិលេខ ១ និងផ្លូវជាតិលេខ ៥ ផងដែរ។
បើតាមទំព័រហ្វេសប៊ុករបស់លោកនាយករដ្ឋមន្ត្រី រថយន្តក្រុងសាធារណៈ ៦០គ្រឿង ដែលបំពាក់មកជាមួយនូវស្លាកសញ្ញា «រាជធានីភ្នំពេញ»នោះ នឹងត្រូវដាក់ពង្រាយសម្រាប់ដឹកជញ្ជូនប្រជាពលរដ្ឋដោយឥតបង់ប្រាក់ អំឡុងពិធីបុណ្យចូលឆ្នាំថ្មីខាងមុខនេះ៕