រដ្ឋាភិបាលឲ្យដឹងថាស្ថាប័នជំនាញបានបន្តឃាត់ខ្លួនជនអន្តោប្រវេសន៍វៀតណាមជិត១០០នាក់ទៀតនៅខណ្ឌច្បារអំពៅ ដោយសង្ស័យថាពួកគេលួចឆ្លងដែននិងកំពុងស្នាក់នៅក្នុងប្រទេសកម្ពុជាដោយខុសច្បាប់។
ប្រធានផ្នែកស៊ើបអង្កេតនិងអនុវត្តនីតិវិធីនៃនាយកដ្ឋានអន្តោប្រវេសន៍លោក អ៊ុក ហៃសីឡា មានប្រសាសន៍ថា នៅថ្ងៃទី១ ខែកក្កដា ឆ្នាំ២០១៦នេះ ក្រុមការងាររបស់លោកសហការជាមួយកម្លាំងនគរបាលរាជធានីភ្នំពេញនិងព្រះរាជអាជ្ញារងលោក សៀង សុខ បានចុះទៅឃាត់ខ្លួនជនជាតិវៀតណាមចំនួន៩៣នាក់ក្នុងនោះមានស្រី៣៤នាក់នៅបន្ទប់ផ្ទះជួលស្ថិតនៅភូមិតាង៉ូវកណ្តាល សង្កាត់និរោធ ខណ្ឌច្បារអំពៅ រាជធានីភ្នំពេញ។
លោកថាក្រុមការងារជំនាញកំពុងសាកសួរជនជាតិវៀតណាមទំាងនោះ ដោយលោកថាបើជនជាតិវៀតណាមមកស្នាក់នៅកម្ពុជាគ្មានលិខិតឆ្លងដែន នោះអាជ្ញាធរនឹងបញ្ជូនទៅស្រុកកំណើតវិញ។ លោកបន្តថា៖ ”យើងយកគាត់មកសាកសួរពិនិត្យមើលជាក់ស្តែង ថាតើគាត់មានលិខិតឆ្លងដែនមានឯកសារអ្វីខ្លះដែលធ្វើដំណើរមកកម្ពុជា បើអត់ យើងនឹងបណ្តេញគាត់ទៅស្រុកវិញ”។
ប្រភពដដែលបញ្ជាក់ថា បើថ្ងៃក្រោយជនជាតិវៀតណាមនោះនៅបន្តលួចចូលទឹកដីខ្មែរខុសច្បាប់ទៀត លោកថាក្រសួងនឹងចាប់បញ្ជូនទៅតុលាការឲ្យចាត់វិធានការច្បាប់។
លោក អ៊ុក ហៃសីឡា បញ្ជាក់ថាគិតត្រឹមថ្ងៃទី១ ខែកក្កដា ឆ្នាំ២០១៦នេះអគ្គនាយកដ្ឋានអន្តោប្រវេសន៍បានចាប់បញ្ជូនជនបរទេស១៣ ០០០នាក់ទៅស្រុកកំណើតវិញ ដែលក្នុងនោះមានជនជាតិវៀតណាមជាង៨ ០០០នាក់ ក្នុងចំណោម៦៨សញ្ជាតិ៕