គណបក្សប្រឆាំង បានចេញសេចក្ដីថ្លែងការណ៍មួយកាលពីថ្ងៃម្សិលមិញនេះ ដោយសង្ឃឹមថា ស្ថានភាពនយោបាយកម្ពុជានឹងកាន់តែល្អប្រសើរ ក្នុងដំណើរឆ្ពោះទៅរកការបោះឆ្នោតជាតិនៅឆ្នាំក្រោយ បន្ទាប់ពីមានការដោះលែងសកម្មជនសិទ្ធិមនុស្ស និងមន្ត្រីរៀបចំការបោះឆ្នោត។
មន្ត្រីសិទ្ធិមនុស្សអាដហុក ៤រូប និងអគ្គលេខាធិការរង គ.ជ.ប. លោក នី ចរិយា ត្រូវបានតុលាការសម្រេចឲ្យនៅក្រៅឃុំបណ្ដោះអាសន្នកាលពីល្ងាចថ្ងៃទី២៩ ខែមិថុនាកន្លងមកថ្មីៗនេះ បន្ទាប់ពីត្រូវបានឃុំខ្លួនអស់រយៈពេលជាង ១ឆ្នាំមកហើយ ក្រោមការចោទថា បានសូកប៉ាន់សាក្សី និងសមគំនិតក្នុងរឿងសូកប៉ាន់សាក្សី ពាក់ព័ន្ធនឹងសំណុំរឿងនាង ខុម ចាន់តារាទី ហៅស្រីមុំ ដែលត្រូវបានគេទម្លាយថា មានទំនាក់ទំនងស្នេហាចម្រូងចម្រាស់ជាមួយមេដឹកនាំបក្សប្រឆាំង លោក កឹម សុខា។
ក្នុងសេចក្ដីថ្លែងការណ៍កាលពីថ្ងៃម្សិលមិញនេះ គណបក្សសង្គ្រោះជាតិ បានស្វាគមន៍ចំពោះការដោះលែងមន្ត្រីសិទ្ធិមនុស្សទាំង ៤រូប និងមន្ត្រីរៀបចំការបោះឆ្នោត។
គណបក្សនេះក៏បានចូលរួមត្រេកអរជាមួយនឹងក្រុមគ្រួសាររបស់ពួកគេផងដែរ បន្ទាប់ពីពួកគេត្រូវបានដោះលែងឲ្យនៅក្រៅឃុំនោះ។
បក្សប្រឆាំងបន្ថែមថា ខ្លួនសង្ឃឹមថា នេះជាជំហានមួយដើម្បីឈានទៅរកស្ថានភាពនយោបាយកាន់តែល្អប្រសើរឡើង ក្នុងការបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ខាងមុខ៕