បណ្តុំអង្គការអន្តរជាតិប្រមាណ១២ស្ថាប័ន បានចេញសេចក្តីប្រកាសរួម រិះគន់ដល់សកម្មភាពបិទអង្គការ និង ការគំរាមកំហែងសារព័ត៌មានឯករាជ្យ ពីភាគីរដ្ឋាភិបាលកម្ពុជា ដោយថារដ្ឋាភិបាលបានរំលោភដល់សិទ្ធិមនុស្ស និងសេរីភាពសារព័ត៌មាននៅកម្ពុជា។
សេចក្តីប្រកាសរួមមួយចេញផ្សាយថ្ងៃទី១កញ្ញា អង្គការអន្តរជាតិដែលធ្វើការខាងសិទ្ធិមនុស្សចំនួន១២ បានបង្ហាញការព្រួយបារម្ភពីស្ថានភាពសិទ្ធិមនុស្ស ព្រមទាំងសេរីភាពសារព័ត៌មាននៅកម្ពុជានាពេលបច្ចុប្បន្ន និងថ្កោលទោសរដ្ឋាភិបាលកម្ពុជា អំពីសកម្មភាពកន្លងទៅនេះ។
សេចក្តីប្រកាសដដែល ក៏បានឲ្យដឹងដែរថា សកម្មភាពរបស់រដ្ឋាភិបាលបែបនេះ អាចធ្វើឲ្យមានការប៉ះពាល់ដល់ តម្លាភាព និងសេរីភាពនៃការបោះឆ្នោតជាតិនៅឆ្នាំក្រោយនេះ។
ក្រុមអង្គការទាំងនោះបានធ្វើការថ្កោលទោសរដ្ឋាភិបាលអំពីការប្រកាសបិទនិងបញ្ឈប់សកម្មភាព វិទ្យាស្ថានជាតិប្រជាធិបតេយ្យ ជាអង្គការអន្តរជាតិដែលទទួលជំនួយពីអាមេរិក កាលពីថ្ងៃទី២៣ខែសីហា ដោយថាអង្គការនេះ ធ្វើការដើម្បីលើកកម្ពស់ប្រជាធិបតេយ្យ ព្រមទាំងសិទ្ធិមនុស្សដែលអាចទុកចិត្តបំផុត។ ការព្រួយបារម្ភមួយទៀត គឺការព្រមានបិទបន្ទប់ស្ថានការណ៍។
បើតាមសេចក្តីប្រកាស រដ្ឋាភិបាលកម្ពុជា នៅចុងខែសីហានេះ ក៏បានគំរាមកំហែងដល់ការផ្សាយរបស់វិទ្យុឯករាជ្យមួយចំនួនដូចជា វិទ្យុសម្លេងសហរដ្ឋអាមេរិក (VOA) វិទ្យុអាស៊ីសេរី (RFA) និងវិទ្យុសម្លេងប្រជាធិបតេយ្យ (VOD) ជាពិសេស គឺការគំរាមកំហែងលើសារព័ត៌មានអន្តរជាតិ The Cambodia Daily ដែលបច្ចុប្បន្ន ប្រឈមនឹងការបិទស្ថាប័ន ដោយមូលហេតុការមិនបានបង់ពន្ធលើការធ្វើអាជីវកម្ម។
ទន្ទឹមនឹងការរិះគន់ អង្គការទាំងនោះក៏លើកទឹកចិត្តឲ្យរដ្ឋាភិបាលកម្ពុជាគួរយកចិត្តទុកដាក់និងគាំទ្រការងាររបស់ពួកគេ និងបើកឱកាសឲ្យប្រជាពលរដ្ឋចូលរួមក្នុងលិទ្ធិប្រជាធិបតេយ្យឲ្យបានច្រើនជាងមុន ជាជាងការធ្វើទុក្ខបុកម្នេញលើអង្គការអន្តរជាតិ និងសារព័ត៌មានឯករាជ្យទៅវិញ៕