រដ្ឋមន្ត្រីក្រសួងមហាផ្ទៃ អះអាងថា ករណីគ្រោះថ្នាក់ចរាចរណ៍ នៅតែជាបញ្ហាប្រឈមនៅកម្ពុជា និងតំបន់ ហើយបានស្នើឲ្យអង្គការសហប្រជាជាតិផ្តល់ជំនួយបន្ថែមដើម្បីធ្វើសកម្មភាព ទប់ស្កាត់បញ្ហាដែលកំពុងប្រឈមនេះ។
តាមការចុះផ្សាយរបស់អគ្គស្នងការដ្ឋាននគរបាលជាតិ កាលពីថ្ងៃទី ២៩ខែកញ្ញាបានឲ្យដឹងថា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានស្នើទៅ គណៈកម្មាការសេដ្ឋកិច្ចនិងសង្គម នៃអង្គការសហប្រជាជាតិសម្រាប់តំបន់អាស៊ីប៉ាហ្វិក (UNESCAP) ឲ្យផ្តល់ជំនួយជា ថវិការ បច្ចេកទេស និងធនធានមនុស្ស សម្រាប់ធ្វើសកម្មភាពទប់ស្កាត់ករណីគ្រោះថ្នាក់ចរាចរណ៍នៅកម្ពុជា និងក្នុងតំបន់អាស៊ីប៉ាស៊ីហ្វិកបន្ថែមទៀត។
ការថ្លែងរបស់លោក ស ខេង នេះធ្វើឡើងក្នុងពិធីបិទសិក្ខាសាលាមួយ កាលពីថ្ងៃ ២៨ខែកញ្ញា នៅសណ្ឋាគារកាំបូឌីយ៉ាណា ស្តីពីបច្ចុប្បន្នភាព គោលបំណង និងគោលដៅសទវត្សសុត្ថិភាពចរាចរណ៍ សម្រាប់ឆ្នាំ ២០១១ដល់ឆ្នាំ២០២០ ដែលមានការចូលរួមពីមន្ត្រីពាក់ព័ន្ធនៃប្រទេស ៧ក្នុងតំបន់អាស៊ាន និងប្រទេសមកពីអាស៊ីប៉ាស៊ីហ្វិក។
ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក លោក ស ខេង ព្រមទាំងអង្គការសហប្រជាតិ សម្រាប់តំបន់អាស៊ីប៉ាស៊ីហ្វិក ប្តេជ្ញាថា អនុវត្តន៍គោលដៅទប់ស្កាត់និងកាត់បន្ថយចំនួនអ្នកស្លាប់និងរបួស ដោយ សារករណីគ្រោះថ្នាក់ចរាចរណ៍ឲ្យបាន ៥០ភាគរយនៅដំណាច់ឆ្នាំ២០២០ខាងមុខនេះ។
ម៉ាប់ ស៊ុយ [email protected]
