រដ្ឋាភិបាលកម្ពុជានៅដើមឆ្នាំ២០១៧នេះ បានឲ្យដឹងថា អ្នកបើកបររថយន្តដឹកជញ្ជូនអ្នកដំណើរ ឬទំនិញចំនួនប្រមាណជិត១៣០នាក់ មានសារធាតុញៀន ដែលស្មើនិង២០ភាគរយ នៃចំនួនអ្នកបើកបរដែលបានត្រួតពិនិត្យ។
នៅក្នុង «កិច្ចប្រជុំបូកសរុបលទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោកឆ្នាំ២០១៦» នាព្រឹកថ្ងៃទី២ខែមករានេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានរកឃើញថា ក្នុងឆ្នាំ២០១៦ អ្នកបើកបររថយន្តដឹកជញ្ជូនអ្នកដំណើរ ឬទំនិញចំនួន១២៩នាក់ មានផ្ទុកសារធាតុញៀន ដែលចំនួននេះស្មើនិង២០ភាគរយ នៃចំនួនអ្នកបើកបរសរុប៦៦៥ ដែលបានតាមដាននិងធ្វើការត្រួតពិនិត្យនាពេលកន្លងមក។
ទោះជាយ៉ាងណា របាយការណ៍ដដែល មិនបានពន្យល់លម្អិតអំពីមូលហេតុដែលនាំអ្នកបើកបរទាំងនោះប្រើប្រាស់គ្រឿងញៀន ព្រមទាំង បង្ហាញឈ្មោះក្រុមហ៊ុនដឹកអ្នកដំណើរឬដឹកទំនិញ ដែលមានបុគ្គលិករបស់ខ្លួន មានសារធាតុញៀននោះទេ។
បើតាមរបាយការណ៍ កម្ពុជាបានបង្ហាញពីកិច្ចប្រឹងប្រែងក្នុងការរឹតបន្តឹងអនុវត្តច្បាប់ចរាចរណ៍ផ្លូវគោក ដោយបានត្រួតពិនិត្យនិងរកឃើញយានយន្តបើកបរលើសល្បឿនកំណត់មានជាង៤០ម៉ឺនគ្រឿង (៣៥៨ ៨៨១គ្រឿង) អ្នកបើកបរមានជាតិស្រវឹងចំនួនជាង៣០ម៉ឺននាក់ (២៧៨ ២១៨នាក់)។