យ៉ាងហោចណាស់ រាជធានីខេត្តចំនួន៣ រួមមានរាជធានីភ្នំពេញ ខេត្តព្រះសីហនុ និងខេត្តកំពត បានជាប់លំដាប់ពិន្ទុខ្ពស់និងនាំមុខគេ ខាងបញ្ហាគ្រោះថ្នាក់ចរាចរណ៍ច្រើននៅក្នុងឆ្នាំ២០១៦ ខណៈរបាយការណ៍ថា អត្រាគ្រោះថ្នាក់ចរាចរណ៍បានថយចុះប្រមាណ១១ភាគរយ បើធៀបរយៈពេលដូចគ្នាក្នុងឆ្នាំ២០១៥។
នៅក្នុង «កិច្ចប្រជុំបូកសរុបលទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោកឆ្នាំ២០១៦» នាព្រឹកថ្ងៃទី២ខែមករានេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានរកឃើញថា គ្រោះថ្នាក់ចរាចរណ៍ក្នុងឆ្នាំ២០១៦ មានចំនួន ៣៧ ០០០លើក ដែលបណ្តាលឲ្យមនុស្សស្លាប់ចំនួន ១ ៧១៧នាក់ និងរបួសចំនួន ៦ ៦០៧នាក់។
បន្ថែមពីនេះ របាយការណ៍ដដែល បានឲ្យដឹងថា ភូមិសាស្ត្រចំនួនបីមានបញ្ហាគ្រោះថ្នាក់ចរាចរណ៍ច្រើនជាងគេ គឺរាជធានីភ្នំពេញ កើតមានចំនួន៣៨៨លើក ខេត្តព្រះសីហនុចំនួន២៨៧លើក និងខេត្តកំពតមានចំនួន២៣៨លើក។
បើតាមរបាយការណ៍ អត្រាគ្រោះថ្នាក់ចរាចរណ៍នៅក្នុងឆ្នាំ២០១៦នេះ គឺបានថយចុះចំនួន៤៤៣លើក គឺស្មើនិង១១ភាគរយ ស្របពេលបទល្មើសគ្រោះថ្នាក់ចរាចរណ៍ភាគច្រើន បណ្តាលមកពីការបើកបរលើសល្បឿនកំណត់ មិនប្រកាន់ស្តាំ ស្រវឹង មិនគោរពសិទ្ធិ បត់និងវ៉ាជែង កត្តាយានយន្ត រួមទាំងការងងុយដេករបស់អ្នកបើកបរ។
