កម្មកររោងចក្រកាត់ដេរសម្លៀកបំពាក់ក្នុងខេត្តកំពង់ស្ពឺចំនួន២៧នាក់ បានរងរបួសនិងសន្លប់ នៅម៉ោង៧ព្រឹកថ្ងៃព្រហស្បតិ៍ បន្ទាប់ពីមានហេតុការណ៍ផ្ទុះអំពូលក្នុងរោងចក្រ បណ្តាលឲ្យកម្មករភ័យស្មានតែមានភ្លើងឆេះ ទើបមានការរត់ចេញពីកន្លែងធ្វើការហើយជាន់គរលើគ្នា។
តាមគេហទំព័រអគ្គស្នងការដ្ឋាននគរបាលជាតិបានឲ្យដឹងថារោងចក្រនោះឈ្មោះ សាប្រ៊ីណា មានទីតាំងនៅកជាប់ផ្លូវជាតិលេខ៤ ក្នុងភូមិត្រពាំងឬស្សី ឃុំសំបូរ ស្រុកសំរោងទង ខេត្តកំពង់ស្ពឺ។ អ្នកដែលរងរបួសនិងសន្លប់ទាំង២៧នាក់ ត្រូវបញ្ជូនទៅសង្គ្រោះនៅមន្ទីររដ្ឋខេត្តកំពង់ស្ពឺ១៧នាក់និងពេទ្យឯកជន១០នាក់។
តាមប្រភពដដែលឲ្យដឹងថា អំពូលដែលផ្ទុះនោះចេញពីជាន់ទី១អាគារទី២ ដែលកន្លែងមានកម្មករធ្វើការទាំងអស់ចំនួន៥៩៣៣នាក់។ ក្រោយហេតុការណ៍កើតឡើង និង មានការចុះអន្តរាគមន៍ពីសមត្ថកិច្ចមក រដ្ឋបាលរោងចក្រក៏សម្រេច ឲ្យកម្មករសម្រាកមួយថ្ងៃ ដើម្បីដោះស្រាយបញ្ហាដែលបានកើតឡើងនេះ៕
