របាយការណ៍របស់អគ្គស្នងការដ្ឋាននគរបាលជាតិនៃក្រសួងមហាផ្ទៃបានបញ្ជាក់ថា នៅឆ្នាំ២០១៦ ស្ថានភាពព្រំដែនកម្ពុជាជាប់ជាមួយប្រទេសជិតខាង មានភាពល្អប្រសើរ គឺមិនមានជម្លោះប្រឈមុខដាក់គ្នាដោយប្រដាប់អាវុធកើតឡើងនោះទេ។
ក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចសហប្រតិបត្តិការការពារសន្តិសុខ តាមព្រំដែននៅថ្ងៃទី១ខែកុម្ភៈ អគ្គស្នងការរងនគរបាលជាតិលោក ដាំ វុទ្ធី ថ្លែងថា ព្រំដែនមានស្ថានភាពល្អប្រសើរដោយគ្មានការប្រឈមមុខដាក់គ្នាដោយអាវុធជាមួយប្រទេសជិតខាង។ លោកបន្តថា កងកម្លាំងនគរបាលការពារព្រំដែនបានអនុវត្តខ្ជាប់ខ្ជួនតាមគោលការណ៍របស់ប្រមុខរាជរដ្ឋាភិបាល និងបានកសាងខ្សែបន្ទាត់ព្រំដែនជាមួយប្រទេសជិតខាងឲ្យក្លាយជាព្រំដែន សន្តិភាព មិត្តភាព សហប្រតិបត្តិការ និងការអភិវឌ្ឍន៍។នេះ បើតាមអគ្គស្នងការដ្ឋាននគរបាលជាតិ។
កម្ពុជាមានព្រំដែនជាប់ជាមួយប្រទេស ឡាវ វៀតណាម និងថៃ។ បើទោះជាមិនមានករណីជម្លោះប្រដាប់អាវុធកើតឡើង ប៉ុន្តែនៅតាមព្រំដែនក្នុងឆ្នាំ២០១៦ ក៏មានបទល្មើសមួយចំនួនដែររួមមានព្រំដែនកម្ពុជា-ថៃ ២២លើក កម្ពុជា-វៀតណាម ២៤លើក កម្ពុជា-ឡាវ ១លើក៕