សមាជិកព្រឹទ្ធសភាមួយរូបមកពីគណបក្សប្រជាជនកម្ពុជា លោក ប៉េង ប៉ាត់ បានទទួលមរណភាពកាលពីយប់អធ្រាត្រថ្ងៃពុធនេះ ដោយរោគាពាធ។
នៅក្នុងសេចក្តីជូនដំណឹងមួយចេញផ្សាយនៅថ្ងៃទី២ខែមីនានេះ ព្រឹទ្ធសភាបានឲ្យដឹងថាលោក ប៉េង ប៉ាត់ជាសមាជិកគណៈកម្មការមហាផ្ទៃ ការពារជាតិ ទំនាក់ទំនងរដ្ឋសភា ព្រឹទ្ធសភា អធិការកិច្ចនិងមុខងារសាធារណៈបានទទួលមរណភាព នៅវេលាម៉ោង១និង៣៥នាទីរំលងអធ្រាត្រ ក្នុងជន្មាយុ៦៦ឆ្នាំ ដោយរោគាពាធ។ សេចក្តីជូនដំណឹងបន្តថាពិធីដង្ហែសពនឹងប្រព្រឹត្តទៅនៅព្រឹកថ្ងៃសៅរ៍ទី៥ខែមីនា ទៅវត្តបុទុមវត្តី។
លោក ប៉េង ប៉ាត់ ជាស្វាមីរបស់លោកស្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ច។
អ្នកនាំពាក្យព្រឹទ្ធសភា លោក ម៉ម ប៊ុននាង ប្រាប់វីអូឌី(VOD)ថាលោក ប៉េង ប៉ាត់ បានបំពេញតួនាទីជាសមាជិកព្រឹទ្ធសភាកម្ពុជាបានបីអាណត្តិមកហើយដែលមានរយៈពេលប្រមាណជា៨ទៅ៩ឆ្នាំមកហើយមកដល់ពេលនេះ។ លោកបញ្ជាក់ថាលោកបានទទួលមរណភាពនេះដោយសារជំងឺមនុស្សចាស់។ លោកមានប្រសាសន៍ថា៖ “រោគាពាធគ្មានអីក្រៅពីជំងឺមនុស្សចាស់ លើសឈាមអីហ្នឹង។ តែមិនទាន់ដឹងច្បាស់ទេ។ គាត់ទៅពេទ្យពិនិត្យប៉ុន្មានដងហើយហ្នឹង”៕