ក្នុងការបោះឆ្នោតដ៏សំខាន់មួយកាលពីថ្ងៃអង្គារ “Super Tuesday” លោកស្រី Hillary Clinton របស់គណបក្សប្រជាធិបតេយ្យ និងលោក Donald Trump របស់គណបក្សសាធារណរដ្ឋ ទទួលបានការគាំទ្រច្រើនជាងគេ ក្នុងការប្រណាំងប្រជែងសម្រាប់ជាបេក្ខភាពប្រធានាធិបតីរបស់សហរដ្ឋអាមេរិក។
បណ្ដាញផ្សាយព័ត៌មាន BBC បានផ្សាយថា ទាំងលោក Trump និងលោកស្រី Clinton បានឈ្នះការបោះឆ្នោតនៅក្នុងរដ្ឋចំនួន៧ដូចគ្នា ដោយលោក Trump ទទួលបានជ័យជំនះនៅក្នុងរដ្ឋ Alabama, Georgia, Massachusetts, Tennessee, Virginia, Arkansas និងរដ្ឋVermont។ ឯលោកស្រី Clinton ឈ្នះនៅក្នុងរដ្ឋ Alabama, Georgia, Tennessee, Virginia, Arkansas, Texas, និងរដ្ឋMassachusetts។
សម្រាប់បេក្ខជនរបស់គណបក្សសាធរណរដ្ឋម្នាក់ទៀត គឺ Ted Cruz ទទួលជ័យជំនះលើលោក Trump នៅក្នុងរដ្ឋចំនួន២គឺរដ្ឋTexas និងOklahoma។ ចំណែកឯលោក Bernie Sander របស់គណបក្សប្រជាធិបតេយ្យបានយកជ័យជំនះលើលោកស្រី Clinton នៅរដ្ឋចំនួនបួនគឺរដ្ឋOklahoma រដ្ឋMinnesota រដ្ឋColorado និងស្រុកកំណើតរបស់លោកគឺរដ្ឋ Vermont។
ការបោះឆ្នោតកាលពីថ្ងៃអង្គារ ឬ”Super Tuesday” គឺជាការបោះឆ្នោតសំខាន់ជាងគេមួយនៅក្នុងការរកសំឡេងគាំទ្រក្នុងបក្ស សម្រាប់បេក្ខភាពប្រធានាធិបតី ដោយពលរដ្ឋនៅរដ្ឋចំនួន១១ទៅបោះឆ្នោតក្នុងថ្ងៃតែមួយ។
គួរបញ្ជាក់ថា អាមេរិកនឹងបោះឆ្នោតជ្រើសរើសប្រធានាធិបតីនៅថ្ងៃទី៨ ខែវិច្ឆិកា ដែលជាការជ្រើសរើសតំណែងប្រធានាធិបតីលើកទី៤៥ជំនួសលោក ប៉ារ៉ាក់ អូបាម៉ា ដែលនឹងចូលនិវត្តន៍៕
ប្រភព៖ BBC