ឧបនាយករដ្ឋមន្ត្រីរបស់ម៉ាឡេស៊ីថ្លែងនៅថ្ងៃអង្គារនេះថា ពួកគេសម្រេចលុបចោលទិដ្ឋការមិនបង់ប្រាក់ឲ្យជនជាតិកូរ៉េខាងជើងចូលក្នុងប្រទេសម៉ាឡេស៊ីដែលអនុញ្ញាតកាលពីពេលកន្លងទៅ ដោយសារបញ្ហាទាក់ទងនិងជម្លោះនៃការសម្លាប់បងប្រុសលោក គីម ជុងអ៊ុន។
ទីភ្នាក់ងារព័ត៌មានរដ្ឋម៉ាឡេស៊ី Bernama បានចុះផ្សាយនៅថ្ងៃព្រហស្បតិ៍នេះថា គម្រោងនៃការលុបចោលទិដ្ឋការមិនគិតថ្លៃដល់ជនជាតិកូរ៉េខាងជើងនេះ នឹងចាប់ផ្តើមពីថ្ងៃទី៦ខែមីនា ព្រោះហេតុផលដើម្បីពង្រឹងសន្តិសុខរបស់ជាតិ។ Bernama ចុះផ្សាយដោយយោងតាមការអះអាងរបស់លោក ឧបនាយករដ្ឋមន្ត្រី Ahmad Zahid Hamidi។
ការប្រកាសនេះធ្វើឡើងបន្ទាប់ពីមានការខ្វែងគំនិត និងមានជម្លោះពាក្យសម្តីខ្លាំងរវាងកូរ៉េខាងជើង និង ម៉ាឡេស៊ីជុំវិញករណីឃាត់កម្មសម្លាប់លោក គីម ជុងណាម បងប្រុសលោកគីមជុង អ៊ុន នៅក្នុងព្រលានយន្តហោះម៉ាឡេស៊ីកាលពីថ្ងៃទី១៣ខែកុម្ភៈ។ ជុំវិញករណីឃាតកម្មនេះ កូរ៉េខាងត្បូង និងអាមេរិកអះអាងថា ឃាតកម្មនោះបង្កឡើងដោយរដ្ឋអំណាចកូរ៉េខាងជើងដោយខ្លួនឯង៕