មន្ត្រីនៅក្រសួងមហាផ្ទៃបានឲ្យដឹងថា នៅថ្ងៃបិទបញ្ចប់យុទ្ធនាការឃោសនាបោះឆ្នោតឃុំសង្កាត់ មានបុគ្គលិករដ្ឋនៅក្នុងស្ថាប័ននេះប្រហែល៧០ភាគរយ បានឈប់សំរាកទៅចូលរួមឃោសនាជាមួយបក្សកាន់អំណាច។
មន្ត្រីក្រសួងមហាផ្ទៃ ដែលស្នើសុំមិនបញ្ចេញឈ្មោះ ប្រាប់VOD នៅថ្ងៃសុក្រទី២ខែមិថុនានេះថា មន្ត្រីរាជការនៅក្នុងក្រសួងមហាផ្ទៃប្រហែលជា៧០ភាគរយ បានដាក់ច្បាប់ឈប់សំរាកប្រចំាឆ្នាំ ចុះទៅតាមខេត្តមួយចំនួនដូចជា កំពង់ចាម ព្រៃវែង ស្វាយរៀង បាត់ដំបង កណ្តាល និងក្នុងរាជធានីភ្នំពេញជាដើម ដើម្បីចូលរួមដង្ហែក្បួនឃោសនាបោះឆ្នោតឃុំសង្កាត់ ឲ្យគណបក្សប្រជាជនកម្ពុជា។
ប្រភពដដែលបានឲ្យដឹងទៀតថា មន្ត្រីរាជការមួយចំនួនដែលទៅចូលរួមហែក្បួនយុទ្ធនាការឃោសនាបោះឆ្នោតនៅថ្ងៃបិទបញ្ចប់ថ្ងៃទី២មិថុនានេះ ពួកគេមិនចង់ទៅចូលរួមឃោសនានោះទេ ប៉ុន្តែថា ធ្វើតាមបញ្ជាថ្នាក់លើតែប៉ុណ្ណោះ។
អ្នកនាំពាក្យក្រសួងមហាផ្ទៃលោក ខៀវ សុភ័គ ទទួលស្គាល់ថា ពិតជាមានមន្ត្រីរាជការក្នុងក្រសួងមហាផ្ទៃសុំច្បាប់ឈប់សំរាកប្រចំាឆ្នាំ ទៅចូលរួមឃោសនាឲ្យបក្សប្រជាជនកម្ពុជាពិតមែន ដោយបន្ថែមថា លោកក៏សុំច្បាប់ចូលរួមឃោសនាជាមួយបក្សកាន់អំណាចដែរ ប៉ុន្តែលោកថា អ្នកដែលផ្តល់ព័ត៌មានឲ្យវិទ្យុVODជាអ្នកគំាទ្របក្សប្រឆំាង។
លោកនិយាយថា៖ «អ្នកដែលនិយាយបែបហ្នឹង គឺពួកដែលកាន់ជើងបក្សប្រឆំាង ហើយបើសិនជា៧០ភាគរយឈប់បានសេចក្តីថា បក្សប្រជាជននូវមានសំឡេង៧០ភាគរយហ្នឹងឯង»។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សលោក មឿន តុលា យល់ថា បើមន្ត្រីរាជការសុំច្បាប់ឈប់សំរាកប្រចំាឆ្នាំទៅចូលរួមឃោសនាបោះឆ្នោតគំាទ្របក្សកាន់អំណាចបាន លោកថា ស្ថាប័នរដ្ឋគួរតែប្រាប់ទៅថៅកែសហគ្រាស រោងចក្រ អនុញាតឲ្យកម្មករ-កម្មការិនីទំាងអស់ បានសុំច្បាប់ឈប់សំរាកប្រចំាឆ្នាំទៅបោះឆ្នោតជ្រើសរើសថ្នាក់ដឹកនាំដែលពួកគេពេញចិត្ត ដោយថានេះ ជារឿងជាតិ។
លើសពីនេះទៀត លោក មឿន តុលា បញ្ជាក់ថា បើមន្ត្រីរាជការមួយចំនួនត្រូវបានគេបង្ខំឲ្យសុំច្បាប់ ដើម្បីចូលរួមឃោសនាបោះឆ្នោតគំាទ្របក្សកាន់អំណាច លោកថា ពេលបោះឆ្នោតឃុំ សង្កាត់ខាងមុខនេះ បក្សកាន់អំណាចនិងបាត់បង់ការគំាទ្រផ្ទុយពីការរំពឹងទុក។
គេសង្កេតឃើញថា កម្លាំងហែក្បួនរបស់បក្សធំៗពីរ គឺបក្សប្រជាជនកម្ពុជា និងបក្សសង្គ្រោះជាតិ ក្នុងយុទ្ធនាការឃោសនាបោះឆ្នោត ឃុំ សង្កាត់ កន្លងមកនេះ សន្ទុះអ្នកចូលរួមប្រហាក់ប្រហែលគ្នា។
ចំណែកនៅថ្ងៃបិទបញ្ចប់ថ្ងៃទី២មិថុនានេះ បក្សកាន់អំណាចធ្វើយុទ្ធនាការទ្រង់ទ្រាយធំនៅភ្នំពេញ តាមគម្រោងអ្នកចូលរួម១៥ម៉ឺននាក់ ខណៈបក្សប្រឆំាងធ្វើនៅភ្នំពេញតាមគម្រោងមានអ្នកចូលរួម១០ម៉ឺន នាក់តែប៉ុណ្ណោះ។
គួរបញ្ជាក់ថា ការឃោសនាបោះឆ្នោត ត្រូវបានកំណត់ឲ្យធ្វើរយៈពេល១៤ថ្ងៃ មុនថ្ងៃបោះឆ្នោតក្រុមប្រឹក្សាឃុំ-សង្កាត់ ដែលគ្រោងធ្វើឡើងនៅថ្ងៃអាទិត្យ ទី០៤ មិថុនាខាងមុខនេះ៕