រដ្ឋាភិបាល នៅថ្ងៃនេះ បានសម្រេចលុបចោលគណបក្សនយោបាយចំនួន ២០ ដោយថា ការសម្រេចបែបនេះស្របទៅនឹងច្បាប់ស្ដីពីគណបក្សនយោបាយ ដែលត្រូវបានកែប្រែនៅដើមឆ្នាំនេះ។
ក្នុងសេចក្ដីសម្រេចមួយចេញនៅថ្ងៃនេះ រដ្ឋមន្ត្រីក្រសួងមហាផ្ទៃ លោក ស ខេង បានសម្រេចលុបចោលគណបក្សនយោបាយចំនួន២០។
ក្នុងសេចក្ដីសម្រេចនោះ ក្រសួងមហាផ្ទៃបានបញ្ជាក់ថា ការសម្រេចលុបចោលគណបក្សទាំង ២០នោះ ត្រូវបានធ្វើឡើងស្របទៅតាមច្បាប់ស្ដីពីវិសោធនកម្មច្បាប់ស្ដីពីគណបក្សនយោបាយ។
ច្បាប់ស្ដីពីគណបក្សនយោបាយ ត្រូវបានក្រុមតំណាងរាស្ត្របក្សកាន់អំណាចកែប្រែកាលពីថ្ងៃទី២០ ខែកុម្ភៈ តែប៉ុន្មានថ្ងៃប៉ុណ្ណោះលោកនាយករដ្ឋមន្ត្រី ហ៊ុន សែន ជំរុញឲ្យធ្វើវិសោធនកម្មច្បាប់នេះ ដោយកំណត់មិនឲ្យអ្នកនយោបាយមានទោស ធ្វើជាប្រធាន និងអនុប្រធានគណបក្សនោះឡើយ៕