លោកនាយករដ្ឋមន្ត្រី ហ៊ុន សែន នៅថ្ងៃនេះ បានស្ដីបន្ទោសទៅលើពលរដ្ឋ ចំពោះការប្រើប្រាស់បន្លែមានសារធាតុគីមី ប៉ុន្តែលោកប្រាប់ទៅពលរដ្ឋ កុំឲ្យបន្ទោសលើរដ្ឋាភិបាលចំពោះការនាំចូលបន្លែផ្ទុកទៅដោយសារធាតុគីមី។
ក្នុងពិធីសម្ពោធសណ្ឋាគារមួយនៅឯខេត្តសៀមរាបនៅព្រឹកថ្ងៃនេះ លោក ហ៊ុន សែន បានថ្លែងថា កន្លងមក ពលរដ្ឋតែងតែបន្ទោសរដ្ឋាភិបាលពីការមិនយកចិត្តទុកដាក់ពិនិត្យមើលបន្លែផ្លែឈើមានសារធាតុគីមី ដែលធ្វើឲ្យប៉ះពាល់ដល់សុខភាពរបស់ពលរដ្ឋ ប៉ុន្តែលោកថា បញ្ហានេះមិនមែនមកពីរដ្ឋាភិបាលនោះទេ។
លោក ហ៊ុន សែន ថ្លែងថា៖ «ខ្ញុំសូមផ្ដាំផ្ញើត្រឡប់ទៅវិញថា សូមមេត្តាកុំទិញនូវអ្វីដែលមានជាតិគីមីទៅ វាចប់បាត់ហើយ វានៅត្រង់កន្លែងហ្នឹង ដោយសារតែយើងសម្រុកទៅទិញអាគីមីហ្នឹង ដូច្នេះគេចេះតែលក់តទៅទៀត រួចហើយចេះតែមកចោទរដ្ឋាភិបាល ហើយខ្លួនឯងអ្នកទទួលទាន ម៉េចក៏មិនមើលផង! រួចចេះតែចោទរដ្ឋាភិបាលថា ទុកឲ្យអ្នកនោះផលិតដោយដាក់ជីគីមីច្រើន ឬក៏មានការនាំចូលបន្លែបង្កាដោយមានគីមីច្រើន ចុះមានយើងអ្នកទៅទិញ កុំទិញវាមានម៉េច អាហ្នឹងមិនមែនរបស់យើងយកទៅចែកណា»។
វីអូឌីមិនអាចទាក់ទងអ្នកនាំពាក្យក្រសួងសុខាភិបាល លោក លី សូវ៉ាន់ បានទេ ដោយទូរសព្ទចូលហើយ ប៉ុន្តែ គ្មានអ្នកទទួលទូរសព្ទនោះឡើយ។
អតីតប្រធានអង្គការកសិកម្មសេដាក លោកបណ្ឌិត យ៉ង់ សាំងកុមារ យល់ថា បញ្ហានេះជាការទទួលខុសត្រូវរបស់រដ្ឋាភិបាល ហើយមិនត្រូវបន្ទោសប្រជាពលរដ្ឋនោះទេ។
លោក៖ «គាត់ត្រូវបន្ទោសក្រសួង ឬក៏មន្ត្រីជំនាញរបស់គាត់ដែរ ព្រោះជាផ្នែកមួយនៃការទទួលខុសត្រូវរបស់រដ្ឋាភិបាលដែរ ក្នុងការដឹកនាំឲ្យកសិករចេះដាំ ចេះផលិតបន្លែសុវត្ថិភាព ដើម្បីយកមកលក់នៅទីផ្សារ។ ទី២ ធ្វើការត្រួតពិនិត្យធ្វើយ៉ាងម៉េចកុំឲ្យមានផលិតផលដែលមានសារធាតុគីមីច្រើនមកចរាចរណ៍លើទីផ្សារ»។
អ្នកជំនាញកសិកម្មរូបនេះ បានអំពាវនាវទៅរដ្ឋាភិបាល ឲ្យជួយដោះស្រាយបញ្ហានេះ ដោយដាក់មន្រ្តីជំនាញផ្នែកកសិកម្មចុះទៅអប់រំប្រជាពលរដ្ឋអំពីការផលិតបន្លែដោយមិនឲ្យប្រើសារធាតុគីមី និងត្រូវត្រួតពិនិត្យឲ្យបានតឹងរឹង លើបន្លែដែលនាំចូលពីប្រទេសជិតខាងមកលក់កម្ពុជា។
ក្រសួងកសិកម្ម រុក្ខាប្រមាញ់ និងនេសាទ ឲ្យដឹងកាលពីថ្ងៃទី២៧ ខែកញ្ញាថា កម្ពុជាបានចំណាយថវិកាជាង ២០០លានដុល្លារអាមេរិកសម្រាប់នាំចូលបន្លែពីបរទេស ដើម្បីយកមកផ្គត់ផ្គង់តម្រូវការក្នុងស្រុក ដោយភាគច្រើននាំចូលពីប្រទេសវៀតណាម។
បើតាមរបាយការណ៍អង្គការ USAID របស់អាមេរិក បានបង្ហាញថា ពលរដ្ឋកម្ពុជាជាង ៧០ភាគរយកំពុងប្រកបរបរកសិកម្ម ប៉ុន្តែកសិករអាចដាំបន្លែបានតែ១ភាគ៣ នៃតម្រូវការទីផ្សារ ដោយសារបញ្ហាផ្សេងៗ។
អង្គការសុខភាពពិភពលោក (WHO) បានលើកឡើងនៅក្នុងរបាយការណ៍សុវត្ថិភាពចំណីអាហារថា ចំណីអាហារផ្ទុកទៅដោយសារធារពុលប្រកបដោយគ្រោះថ្នាក់ ដូចជាមេរោគ បាក់តេរី បារ៉ាស៊ីត ឬសារធាតុគីមី បង្កនូវជំងឺជាង ២០០ប្រភេទ រាប់ចាប់តាំងពីរាគរូសរហូតដល់ជំងឺមហារីក។
របាយការណ៍អង្គការសុខភាពពិភលោកកាលពីឆ្នាំ២០១៥ បានឲ្យដឹងថា ប្រជាជនប្រហែល ៦០០លាននាក់ ឬម្នាក់ក្នុងចំណោម ១០នាក់ នៅលើពិភពលោក បានធ្លាក់ខ្លួនឈឺ បន្ទាប់ពីបរិភោគចំណីអាហារផ្ទុកដោយសារធាតុពុល។
របាយការណ៍ WHO បានឲ្យដឹងទៀតថា មនុស្សយ៉ាងហោចណាស់ ៤២ម៉ឺននាក់ បានស្លាប់នៅរៀងរាល់ឆ្នាំ នៅក្នុងចំណោមពលរដ្ឋពុលចំណីអាហារប្រហែល ៦០០លាននាក់នៅរៀងរាល់ឆ្នាំ៕