មេដឹកនាំគណបក្សប្រជាជនកម្ពុជា លោក ហ៊ុន សែន បានថ្លែងការពារជាថ្មីទៀត ជុំវិញចំណាត់ការរបស់រដ្ឋាភិបាលនិងតុលាការ លើសំណុំរឿងចាប់និងឃុំខ្លួនមេបក្សប្រឆាំង លោក កឹម សុខា ខណៈសហគមន៍អន្តរជាតិជាច្រើន ថ្កោលទោសករណីនេះជាបន្តបន្ទាប់។
ថ្លែងក្នុងពិធីមួយនៅខេត្តសៀមរាប នៅថ្ងៃទី២ខែតុលា លោក ហ៊ុន សែន មានប្រសាសន៍ថា មានបុគ្គលមួយចំនួន ធ្លាប់ដាក់បង្កៃគ្រាប់បែកនៅខេត្តសៀមរាប ដើម្បីប៉ុនប៉ងសម្លាប់រូបលោក ខណៈបុគ្គលមួយចំនួនទៀត រៀបចំផែនការផ្តួលរំលំរដ្ឋាភិបាលស្របច្បាប់។ ករណីនេះ លោកនាយករដ្ឋមន្ត្រី ហ៊ុន សែន ទំនងជាសំដៅលើលោក កឹម សុខា ដែលតុលាការចោទថា ក្បត់ជាតិ។
លោក ហ៊ុន សែន បញ្ជាក់ថា រដ្ឋាភិបាល ត្រូវយកច្បាប់ទៅអនុវត្តចំពោះបុគ្គល ដែលលោកចោទថាបានប្រព្រឹត្តអំពើក្បត់ជាតិ ដើម្បីការពារសន្តិសុខជាតិ ដែលប្រការនោះ មិនមានអ្វីខុសច្បាប់នោះទេ។
លោកថ្លែងថា៖ «គេលើកដៃប្រហារជីវិតខ្ញុំ តាមរយៈដាក់បង្កៃគ្រាប់បែកចំនួន៤គ្រាប់ ដែលអាចថា គ្មានឆ្អឹង គ្មានឆ្អែងទេ បើសិនជាវាផ្ទុះទំាង៤គ្រាប់ ម៉េចក៏គេធ្វើបាន ឯខ្ញុំគ្រាន់តែអនុវត្តច្បាប់ដែលមាន ដែលច្បាប់បានចែងថា អំពើក្បត់ជាតិ វាត្រូវមានទោសបែបណា ម៉េចក៏ខ្ញុំធ្វើមិនបាន ហើយខ្ញុំធ្វើមិនមែនដើម្បីជីវិតខ្ញុំតែម្នាក់ទេ ដើម្បីសេចក្តីសុខរបស់ប្រទេសមួយ ប្រជាជាតិមួយ ហើយក៏ដើម្បីឯករាជ្យ អធិបតេយ្យរបស់ប្រទេសមួយដែរ នេះជាចំណុចដែលត្រូវចោទសួរ ប៉ុន្តែយើងនៅតែបន្តធ្វើ ដោយគ្មានការរុញរា គ្មានញញើតជាមួយអ្វីទំាងអស់…»។
កាលពីថ្ងៃទី២៦ ខែកញ្ញា ឆ្នាំ២០១៧ សាលាឧទ្ធរណ៍ បានបង្គាប់ឲ្យបន្តឃុំខ្លួនមេដឹកនាំបក្សប្រឆាំង លោក កឹម សុខា ដូចសាលាដំបូងរាជធានីភ្នំពេញដែរ ដោយសម្រេចច្រានចោលបណ្តឹងជំទាស់របស់ក្រុមមេធាវីការពារក្តីឲ្យលោក កឹម សុខា ខណៈមេធាវីអះអាងថា ការសម្រេចរបស់តុលាការ ធ្វើដោយបំពានច្បាប់និងរំលោភអភ័យឯកសិទ្ធិសភា។
អ្នកវិភាគនយោបាយ លោក ឯម សុវណ្ណារ៉ា វិភាគថា កម្តៅនយោបាយនៅពេលនេះ ហាក់ពិបាកនឹងនិយាយថា ច្រកចេញតាមផ្លូវណាមួយពិតប្រាកដ នៅពេលដែលរដ្ឋាភិបាលកម្ពុជា ព្យាយាមពន្យល់ថា ការចាប់ខ្លួន លោក កឹម សុខា និងចំណាច់ការមួយចំនួនថា ជាវិធានការច្បាប់ ខណៈសហគមន៍អន្តរជាតិគ្មានជំនឿលើប្រព័ន្ធច្បាប់នៅកម្ពុជានោះ។
អ្នកវិភាគរូបនោះ វិភាគទៀតថា ស្ថានការណ៍នយោបាយនៅពេលនេះ មានតែសហគមន៍អន្តរជាតិទេ ទើបអាចជំរុញឲ្យរដ្ឋាភិបាលងាក ទៅបើកលំហូប្រជាធិបតេយ្យឡើងវិញបាន។
លោកថា៖ «ភាគីរដ្ឋាភិបាលកម្ពុជា និងសហគមន៍អន្តរជាតិហ្នឹង អង្គុយតុជាមួយគ្នា ចរចាគ្នានូវអ្វី ដែលយល់មិនដូចគ្នា។ អញ្ចឹងមធ្យោបាយតែមួយ តាមការចរចាហ្នឹង គឺវាប្រសើជាងអ្វីទាំងអស់ ហើយបើសិនជាគ្រាន់តែសម្តែងមតិ ប្រតិកម្មចុះប្រតិកម្មឡើង វាអត់មានស្អីចេញរួចទេ ច្រកនយោបាយកម្ពុជានៅតែតានតឹង ហើយអ្វី ដែលអូសបន្លាយកាន់តែយូរ រឿងរាវកើតឡើងកាន់តែច្រើនកម្ពុជា ជាអ្នកខាតបង់ មិនមែនសហគមន៍អន្តរជាតិទេ»។
ប្រធានគណបក្សសង្គ្រោះជាតិ លោក កឹម សុខា ត្រូវបានសាលាដំបូងរាជធានីភ្នំពេញ បានបង្គាប់ឲ្យឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ កាលពីដើមខែកញ្ញា ដោចោទថា «ក្បត់ជាតិ»។
ទោះជាយ៉ាងណា ការចាប់ខ្លួន លោក កឹម សុខា រដ្ឋាភិបាល អះអាងថា ជាវិធានការច្បាប់។ ប៉ុន្តែបក្សប្រឆាំង និងសហគមន៍អន្តរជាតិ រួមមានសហភាពអឺរុប បារាំង អាលឺម៉ង់ និងសហរដ្ឋអាមេរិកផងនោះ ហៅការចាប់ខ្លួននេះថា ជាការគាំរាមកំហែងផ្នែកនយោបាយ និងទាមទារឲ្យដោះលែងជាបន្ទាន់ ដោយថា ដើម្បីឲ្យដំណើរការបោះឆ្នោតខាងមុខ ដំណើរការទៅដោយសេរី ត្រឹមត្រូវ និងយុត្តិធម៌៕