មជ្ឈមណ្ឌលសិទ្ធិមនុស្សកម្ពុជា ប្រកាសធ្វើយុទ្ធនាការតាមប្រព័ន្ធអ៊ិនធឺណិត ដើម្បីជំរុញឲ្យរដ្ឋាភិបាល បញ្ចប់និទណ្ឌភាពលើអ្នកសារព័ត៌មាន ដោយអះអាងថា ជនរងគ្រោះមួយចំនួន ដែលត្រូវបានគេសម្លាប់ច្រើនឆ្នាំមកនេះ មិនទាន់ទទួលបានយុត្តិធម៌នៅឡើយ។
នៅថ្ងៃទី២ខែវិច្ឆិកានេះ ជាខួបលើកទី៤នៃទិវាអន្តរជាតិ ដើម្បីបញ្ចប់និទណ្ឌភាព ចំពោះបទល្មើសប្រឆាំងនឹងអ្នកសារព័ត៌មាន ។
សេចក្តីថ្លែងការណ៍ចុះថ្ងៃទី១ខែវិច្ឆិកា មជ្ឈមណ្ឌលសិទ្ធិមនុស្សកម្ពុជា បានឡើងថា ដើម្បីចូលរួមចំណែក បញ្ចប់និទណ្ឌភាព ខ្លួននឹងផ្សព្វផ្សាយ ប្រវត្តិរូប អ្នកសារព័ត៌មាន ដែលគេសម្លាប់ និងជនរងគ្រោះសំខាន់ៗ ចំនួន២២នាក់ តាមប្រព័ន្ធអ៊ិនធឺណិត និងតាំងពិពណ៌នៅទីសាធារណៈ ដើម្បីរំឭកកុំឲ្យរដ្ឋាភិបាលបោះបង់ចោល និងឈប់ស្វែងរកជនដៃដល់មកផ្តន្ទាទោស និងរកយុត្តិធម៌ជូនជនរងគ្រោះ។
មជ្ឈមណ្ឌលសិទ្ធិមនុស្សឲ្យដឹងទៀតថា កម្មវិធីពិពណ៌នេះ ឈ្មោះថា «មិនអាចបំភ្លេចបាន» ដែលនឹងផ្សព្វផ្សាយតាមអ៊ិនធឺណិត ចាប់ពីថ្ងៃទី២នេះទៅ និងតាំងពិពណ៌នៅទីសាធារណៈ ចាប់ពីថ្ងៃទី២៣ ដល់ថ្ងៃទី២៥ខែវិច្ឆិកា។
មជ្ឈមណ្ឌលសិទ្ធិមនុស្សកម្ពុជា បានលើកយកករណីនិពន្ធនាយក កាសែតអន្តរាគមន៍ លោក ធូ ចាមង្គល មកបង្ហាញលើហ្វេសប៊ុក របស់ខ្លួនថា គាត់ ត្រូវបានគេសម្លាប់នៅថ្ងៃទី១០ខែមិថុនាឆ្នាំ១៩៩៤។ ប៉ុន្តែថា អស់រយៈពេល២៣ឆ្នាំក្រោយមក រដ្ឋាភិបាលពុំបានចាប់នរណាម្នាក់ មកផ្ដន្ទាទោសក្នុងករណីសម្លាប់ លោក ចាមង្គល ទេ។
មជ្ឈមណ្ឌលសិទ្ធិមនុស្សកម្ពុជាលើកឡើងទៀតថា ការគោរពសិទ្ធិមនុស្សនៅកម្ពុជា នឹងមិនអាចសម្រេចទៅបានទេ ដរាបណាជនល្មើស នៃការរំលោភបំពានសិទ្ធិមនុស្សធ្ងន់ធ្ងរ មិនត្រូវនាំខ្លួនមកផ្តន្ទទោសនោះ។
VOD មិនអាចទាក់ទងអ្នកនាំពាក្យគណប្រជាជនកម្ពុជា លោក សុខ ឥសាន ដើម្បីឆ្លើយតបទៅនឹងការលើកឡើង របស់មជ្ឈមណ្ឌលសិទ្ធិមនុស្សនេះបានទេ នៅថ្ងៃព្រហស្បតិ៍នេះ ដោយលោកអះអាងថា ជាប់រវល់៕
