ជនជាតិកូរ៉េខាងជើងដែលសង្ស័យថាជាឃាតកសម្លាប់លោក គីម ជុងណាម បងប្រុសដែលមានម្តាយផ្សេងគ្នាជាមួយមេដឹកនាំកូរ៉េខាងជើង ត្រូវបានដោះលែង ហើយរៀបចំបណ្តេញចេញពីប្រទេសម៉ាឡេស៊ី។
តាមសារព័ត៌មានរ៉យទ័រ បានចុះផ្សាយថា កាលពីថ្ងៃព្រហស្បតិ៍ម្សិលមិញ លោក Ri Jong Chol ជាជនសង្ស័យម្នាក់ថា បានចូលរួមសម្លាប់លោក គីម ជុងណាមកាលពីថ្ងៃទី១៣ខែកុម្ភៈនោះ ត្រូវសមត្ថកិច្ចម៉ាឡេស៊ីសម្រេចដោះលែង ហើយបញ្ជូនទៅនាយកដ្ឋាននគរបាលអន្តោប្រវេសន៍ដើម្បីរៀបចំបញ្ជូនទៅប្រទេសកូរ៉េខាងជើងវិញ។
លោក Ri ត្រូវបានសមត្ថកិច្ចឃុំខ្លួនប៉ុន្មានថ្ងៃក្រោយឃាតកម្មសម្លាប់លោក គីម ជុងណាម ប៉ុន្តែរដ្ឋមន្ត្រីក្រសួងយុត្តិម៌ម៉ាឡេស៊ីបានថ្លែងកាលពីថ្ងៃព្រហស្បតិ៍ថា ជនជាតិកូរ៉េខាងជើងរូបនេះមិនមានសារៈសំខាន់ក្នុងនាមជាសាក្សីនោះទេ។ ប៉ុន្តែស្ត្រីពីរនាក់ផ្សេងទៀតគឺម្នាក់ជាជនជាតិវៀតណាម និង ម្នាក់ទៀតជាជនជាតិឥណ្ឌូនេស៊ី ត្រូវបានចោទប្រកាន់ថា បានចូលរួមសម្លាប់លោក គីម ជុងណាម ហើយស្ត្រីទាំងពីរនេះអាចប្រឈមនឹងទោសប្រហារជីវិត។
ទោះយ៉ាងណានគរបាលម៉ាឡេស៊ី កំពុងស្វែងរកជនជាតិកូរ៉េខាងជើងចំនួន៧នាក់ផ្សេងទៀត ដែលសង្ស័យពាក់ព័ន្ធករណីនេះ៕