រដ្ឋមន្ត្រីក្រសួងយុត្តិធម៌របស់អាមេរិកប្រកាសកាលពីម្សិលមិញថា ខ្លួនលោកផ្ទាល់មិនជាប់ពាក់ព័ន្ធករណីស៊ើបអង្កេតលើលោក ដូណល ត្រាំ ពេលឃោសនាបោះឆ្នោត ខណៈកំពុងមានការស៊ើបអង្កេតថា លោកមានទំនាក់ទំនងជាមួយរុស្ស៊ី នាំឲ្យមានការជ្រៀតជ្រែកលើដំណើរការបោះឆ្នោត។ នេះបើតាមទីភ្នាក់ងារព័ត៌មាន AFP។
លោក Jeff Sessions រងការចោទថា ពេលដែលលោក ត្រាំ ធ្វើយុទ្ធនាការឃោសនាបោះឆ្នោត ពេលនោះលោកជា សមាជិកសភា ហើយក៏ជាទីប្រឹក្សារបស់លោកត្រាំ បានជួបជាមួយឯកអគ្គរដ្ឋទូតរុស្ស៊ីប្រចាំនៅអាមេរិក២លើក ដែលសង្ស័យថា អាចជារៀបចំផែនការឲ្យរុស្ស៊ីជ្រៀតជ្រែកការបោះឆ្នោតនាំឲ្យលោក ត្រាំ ទទួលបានជ័យជម្នះ។
ប៉ុន្តែរដ្ឋមន្ត្រីក្រសួងយុត្តិធម៌រូបនេះ បញ្ជាក់ថាពេលដែលលោក ជួបជាមួយឯកអគ្គរដ្ឋទូតរបស់រុស្ស៊ីនោះ លោកមិនមែនជាទីប្រឹក្សារបស់លោក ត្រាំ ទេ គឺគ្រាន់តែជាសមាជិកសភាប៉ុណ្ណោះ។
ការបោះឆ្នោតនៅអាមេរិកកាលពីចុងឆ្នាំ២០១៦រងការចោទថា រុស្ស៊ីលួចចូលលុកលុយក្នុងប្រព័ន្ធកុំព្យូទ័រកែប្រែទិន្នន័យទើបនាំឲ្យលោកដូណល ត្រាំមកពីគណបក្សសាធារណរដ្ឋទទួលបានជ័យជំជម្នះ។ ប៉ុន្តែលោក ត្រាំ បានច្រានចោលការចោទប្រកាន់នេះជាញឹកញាប់៕