លោកនាយករដ្ឋមន្ត្រី ហ៊ុន សែន បានប្រាប់ទៅឲ្យរដ្ឋមន្ត្រីក្រសួងការពារជាតិឲ្យធ្វើការសិក្សាទៅលើផ្លូវ៦០ម៉ែត្រថ្មីដែលទើបនឹងសម្ពោធនៅព្រឹកនេះ ដើម្បីត្រៀមយន្តហោះចុះចត នៅពេលមានអាសន្ន។
«មហាវិថីសម្តេចតេជោ» ឬផ្លូវ៦០ម៉ែត្រនេះ ផ្តើមចេញចំណុចច្រមុះជ្រុះ ក្បាលថ្នល់ ទៅកាន់ក្រុងតាខ្មៅ ខេត្តកណ្តាល ដែលមានប្រវែងជិត១០គីឡូម៉ែត្រនិងទទឹងផ្លូវ៦០ម៉ែត្រដែលជាផ្លូវធំដំបូងគេបង្អស់នៅកម្ពុជា។
ក្នុងពីធីសម្ពោធផ្លូវមួយខ្សែនេះ លោកនាយករដ្ឋមន្ត្រី ហ៊ុន សែន បានបញ្ជាទៅរដ្ឋមន្រ្តីក្រសួងការពារជាតិ លោក ទៀ បាញ់ ឲ្យធ្វើការសិក្សាទៅលើស្ថានភាពផ្លូវនេះដើម្បីត្រៀមលក្ខណៈ ឲ្យយន្តហោះចុះចតបាននៅជិតភ្នំពេញ ក្នុងករណីដែលរាធានីភ្នំពេញមានអាសន្ន។ លោកថាក្នុងពេលសាកល្បងចុះចតលើផ្លូវនោះ លោកសុំឲ្យធ្វើការសាកល្បងចុះចតដោយយន្តហោះយោធា។
លោកថា៖ «យន្តហោះដែលមានសាំងតិចមិនអាចធ្វើដំណើរដល់សៀមរាប មិនអាចធ្វើដំណើរដល់ទីក្រុងហូ ជីមិញ និងទីក្រុងបាងកក ជម្រើសដែលល្អជាងគេគឺនៅតំបន់នេះដែលគួរតែសិក្សា អំពីការចុះចតក្នុងគ្រាមានអាសន្ន នូវប្រភេទយន្តហោះខ្លះ។ ជាពិសេសយន្តហោះដែលមានស្លាបកង្ហា ATR ដែលអាចចុះចតបាននាគ្រាមានអាសន្ន ព្រោះពីសរបស់យើងនេះគឺអាចទ្រទ្រង់បាន ហើយចំងាយដែលវាអាចរត់គឺវាអាចចុះចតបាន ដើម្បីបញ្ជៀសគ្រោះថា្នក់ជាយថាហេតុ ចំណុចនេះទាមទារឲ្យមានការសិក្សាហើយរហូតដល់មានការ ចុះសាកល្បងនូវប្រភេទយន្តហោះយោធារបស់យើង»។
លោកក៏បានបញ្ជារឲ្យបង្កប់ភ្លើងសញ្ញាដែលអាចឲ្យសញ្ញាដល់យន្តហោះមើលឃើញពេលយប់ដើម្បីងាយស្រួលចុះចតផងដែរ៕