«ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ជាពាក្យស្លោកសម្រាប់ដាស់អារម្មណ៍មនុស្សខ្មែរ ឱ្យយកចិត្តទុកដាក់សម្អាតលំនៅដ្ឋាន ទីសាធារណៈ និងរមណីយដ្ឋានឱ្យមានសោភ័ណ្ឌភាពល្អ និងខិតខំបម្រើសេវាគ្រប់ប្រភេទប្រកបដោយចរិយាធម៌ និងអំណររីករាយដល់ភ្ញៀវទាំងជាតិទាំងអន្តរជាតិដើម្បីអភិវឌ្ឍវិស័យទេសចរណ៍កម្ពុជា។ តាមរយៈពាក្យស្លោកនេះ វាពិតជាបានជួយជម្រុញឱ្យមានការកែលម្អរខ្លះៗដែរទាំង ផ្នែកសេវាកម្ម អនាម័យ និងបរិស្ថាន។ តែហាក់មិនទាន់បានជ្រួតជ្រាបទូលំទូលាយនៅឡើយ ទាំងពលរដ្ឋសាមញ្ញ អជ្ញាធរ និងថ្នាក់ដឹកនាំ។ ពេលមានកម្មវិធីធំៗម្តងៗ គេសង្កេតឃើញមានកាកសំណល់រាយប៉ាយពាសវាលពាសកាល និងក្លិនគ្រប់រសជាតិ មានទាំងស្អុយ ឆ្អេះ ជូ និងផ្អូម។ ជាក់ស្តែង គឺក្នុងកម្មវិធីអង្គរសង្ក្រាន ដែលបានរៀបចំនៅឯខេត្តសៀមរាបនាបរិវេណអង្គរវត្តនិងអង្គរធំ។
តាមរយៈការចូលរួមផ្ទាល់ និងការសង្កេតតាមដានកម្មវិធីអង្គរសង្ក្រានបីឆ្នាំជាប់ៗគ្នា ឃើញថា ការរៀបចំកម្មវិធីមានភាពល្អប្រសើរពីមួយឆ្នាំទៅមួយឆ្នាំផ្នែកទស្សនីយភាពនិង សណ្តាប់ធ្នាប់ទាំងមុនពេលនិងកំឡុងពេលដំណើរការកម្មវិធី។ តែផ្នែកអនាម័យនិងបរិស្ថានវិញទាំងក្នុងពេលដំណើរការ និងក្រោយពេលចប់កម្មវិធីនៅមានភាពខ្វះចន្លោះច្រើនស្ទើរពុំគួឲ្យជឿ។
ប្រជាពលរដ្ឋ ភ្ញៀវទេសចរ ទាំងជាតិទាំងអន្តរជាតិបានចូលរួមទស្សនាកំសាន្តច្រើនកកកុញ។ អ្នកខ្លះ បានចម្អិនម្ហូបយកមកពីផ្ទះ អ្នកខ្លះបានទិញនៅតាមស្តង់ ឬតូបលក់ម្ហូបអាហារ ហើយយកទៅញ៉ាំនៅតាមកន្លែងផ្សេងៗ ក្បែរបរិវេណប្រាសាទបុរាណដែលគេប្រារពពិធីអង្គរសង្ក្រាន។ ធម្មជាតិមនុស្ស សត្វគឺផឹកស៊ី ជុះនោម។ អាការៈធម្មជាតិនេះ មានឥទ្ធិពលជាងបញ្ជាស្តេចទៅទៀត ពេលវាកើតអាការៈនេះហើយទាំងមនុស្ស ទាំងសត្វ ទាំងរាស្ត្រ ទាំងមន្ត្រី ត្រូវតែរកកន្លែងបន្ទោបង់ចេញ។ តែជាអកុសលសម្រាប់អ្នកចូលរួមកម្មវិធីអង្គរសង្ក្រានមិនអាចរកបង្គន់សម្រាប់បន្ទោបង់បានឡើយ ព្រោះមិនមានបង្គន់គ្រប់គ្រាន់។
អ្នករៀបចំកម្មវិធី មិនបានរៀបចំបង្គន់ចល័តឲ្យបានគ្រប់គ្រាន់បន្ថែមលើបង្គន់ដែលមានស្រាប់ដ៏តិចតួច និងខ្លះមានតែបង្គន់តែមិនមានទឹកក្នុងបង្គន់ទេ។ ដូច្នេះ គេមានតែបង្ខំចិត្តរកគុម្ពោតព្រៃ ឬកន្លៀតណាមួយដោះទាល់មួយគ្រា ដើម្បីកុំឲ្យពិបាកត្បៀតនិងក្តៅខ្លួនយូរ។ ចំណែកឯកាកសំណល់សម្រាមវិញ ក៏មិនណយដែរ បន្ទាប់ពីហូបចុកឆ្អែត អ្នកខ្លះក៏បានប្រមែប្រមូលទុកដាក់ដល់ធុងសម្រាម និងខ្លះទៀតបានប្រមូលយកទៅទុកដែរ តែធុង សម្រាមពេញហៀរអស់ទៅហើយ រីឯអ្នកខ្លះទៀតក៏បានបន្សល់ទុកកាកសំណល់រាយប៉ាយ ត្រង់នេះមួយដុបត្រង់នោះមួយដុបនៅតាមកន្លែងដែលពួកគេបានអង្គុយស៊ីរៀងៗក្រុម។
ពេលវេលាកន្លងផុតទៅ ទាំងកាកសំណល់ដែលបានបញ្ចេញតាមទ្វារមុខនិងទ្វារក្រោយរបស់មនុស្ស និងកាកសំណល់ម្ហូបអាហារ ដែលនៅសល់សន្ធឹកសន្ធាប់បានសាយភាយនូវក្លិនអសោចគ្រប់រសជាតិនៅជុំវិញប្រាសាទបុរាណដែលជាទីសក្ការៈដ៏សក្តិសិទ្ធិ និងជារមណីយដ្ឋាន ប្រវត្តិសាស្ត្រសម្រាប់ពលរដ្ឋខ្មែរគ្រប់រូប និងជាសម្បត្តិបេតិកភ័ណ្ឌរបស់មនុស្សជាតិនៅទូទាំងពិភពលោក។
សរុបមកវិញ ល្មមដល់ពេលហើយដែលពលរដ្ឋខ្មែរម្នាក់ៗ ត្រូវចូលរួមសម្អាតបរិស្ថាន និងថែរក្សាអនាម័យទាំងនៅផ្ទះខ្លួនឯង នៅទីសាធារណៈ និងតំបន់រមណីយដ្ឋានផ្សេងៗ។ ហើយក៏ល្មមដល់ពេលដែរសម្រាប់អជ្ញាធរ និងថ្នាក់ដឹកនាំក្នុងការចាត់ចែងផែនការការងា ប្រកបដោយចំណេះដឹង សតិសប្បជ្ជៈញៈ និងមនសិការ ក្នុងការសម្អាតបរិស្ថាន និងអនាម័យសាធារណៈ។ រាល់ពេលធ្វើកម្មវិធីអ្វីមួយ ត្រូវរៀបចំគ្រប់ជ្រុងឲ្យបានល្អទាំងមុខឆាក និងក្រោយឆាក និង ទាំងមុនពេល កំឡុងពេលដំណើរការ និងក្រោយពេលបញ្ចប់កម្មវិធី។