លោកនាយករដ្ឋមន្ត្រីបានរិះគន់មន្ត្រីរបស់លោកមួយចំនួនសមត្ថភាពនៅទាបពិបាកធ្វើការងារជាមួយ ហើយ លោកថា បញ្ហាសមត្ថភាពខ្សោយក៏ជាមូលហេតុមួយដែលក្រុមហ៊ុនមួយចំនួនយកបុគ្គលិកពីបរទេស មកដែរ។
ថ្លែងនៅក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា នៅព្រឹកថ្ងៃទី០៣ ខែមេសា ឆ្នាំ២០១៨នេះ លោកនាយករដ្ឋមន្ត្រីហ៊ុន សែន បានទទួលស្គាល់ថាមន្រ្តីដែលធ្វើការនៅក្បែរលោកមួយចំនួនសមត្ថភាព នៅមានកម្រិតនៅឡើយ។
លោកបានថ្លែងយ៉ាងដូច្នេះថា៖ « សូម្បីតែអ្នកធ្វើការនៅក្បែរខ្ញុំ អ្នកខ្លះឃើញតែមុខមកគឺវាពិបាកយល់ ត្រឹមតែ ថាកាន់កាតាបបាន កាន់កាតាបបាន ប៉ុន្តែបើប្រើឲ្យធ្វើអីធ្វើរួចហើយយកមកឲ្យយើងពិនិត្យកែរដដែល អញ្ចឹងវាដដែល។ បើថាយកមកត្រឹមតែកែ ធ្វើសុន្ទរកថាឲ្យយើងមួយ ឧទាហរណ៍អញ្ចឹង បើត្រឹមកែត្រឹម ១០%អីបាន អាគោលការណ៍ធំៗបានប៉ុន្តែដល់ថ្នាក់យកមកឲ្យយើង យើងគ្រាន់តែយកមើលថាទេបើអញ្ចឹង អានេះសរសេរខ្លួនឯងវិញលឿនជាង។»
លោកបានបន្តថា ពេលលោកចូលរួមក្នុងកម្មវិធីណាមួយពេលណាក៏ដោយ ក៍មន្ត្រីរបស់លោកធ្វើ សេចក្តីព្រៀង សុន្ទរកថាសម្រាប់លោកដែរ តែលោកថាពេលខ្លះប្រើមិនកើត។
លោកបានបន្ថែម៖ “អាហ្នឹងហើយ ជាកម្រិត នៃការចេះដឹង។ អ្នកដែលធ្វើការពិតប្រាកដមានប៉ុន្មាន។”
ក្រៅពីថ្លែងរិះគន់មន្រ្តីរបស់ខ្លួន លោកនាយករដ្ឋមន្រ្តីក៏បានទទួលស្គាល់ផងដែរថាព្រោះតែធនធានបញ្ញា ចំណេះដឹង និងសមត្ថភាពរបស់បុគ្គលិកកម្ពុជានៅមានកម្រិតទើបមានក្រុមហ៊ុនវិនិយោគមកពីក្រៅប្រទេសខ្លះ បានបង្ខំចិត្តយក បុគ្គលិកមកពីក្រៅប្រទេស។
