មន្ត្រីប៉ូលិសអ៊ីរ៉ាក់ បាននិយាយថា មនុស្សយ៉ាងតិច ៧០នាក់ ត្រូវបានសម្លាប់ និង ១៣១នាក់ទៀតរងរបួស នៅក្នុងបំផ្ទុះគ្រាប់បែកមួយនៅរដ្ឋធានីបាដាដ ដែលក្រុមរដ្ឋអ៊ីស្លាមប្រកាសទទួលខុសត្រូវ។
សារព័ត៌មាន BBC របស់អង់គ្លេស បានរាយការណ៍ថា រថយន្តផ្ទុកគ្រាប់បែកមួយគ្រឿង បានផ្ទុះនៅជិតភោជនីយដ្ឋានមួយកន្លែង និងតំបន់ទីផ្សារ នៅសង្កាត់មួយក្នុងរដ្ឋធានីបាដាដ កាលពីល្ងាចថ្ងៃសៅរ៍ម្សិលមិញ។
ដងផ្លូវមមាញឹកទៅដោយអ្នកដើរផ្សារ ក្រោយពីថ្ងៃលិច នៅក្នុងរដូវបួសតមអាហាររ៉ាម៉ាដន ដែលចប់នៅសប្ដាហ៍នេះ។
គ្រាប់បែកទីពីរ បានផ្ទុះឡើងនៅភាគខាងជើងរដ្ឋធានីបាដាដ ដោយបានសម្លាប់មនុស្ស ៥នាក់ផ្សេងទៀត។
ការបំផ្ទុះគ្រាប់បែកនេះ ដែលស្ថិតក្នុងចំណោមការបំផ្ទុះគ្រាប់បែកដ៏ប្រល័យបំផុតនៅក្នុងអ៊ីរ៉ាក់ក្នុងឆ្នាំនេះ បានកើតឡើងមួយសប្ដាហ៍ក្រោយពីកម្លាំងសន្តិសុខអ៊ីរ៉ាក់ បានដណ្ដើមយកមកវិញនូវទីក្រុងហ្វាលូចា ពីក្រុមបះបោររដ្ឋអ៊ីស្លាម។
អាជ្ញាធរនិយាយថា ទីក្រុងនេះ ត្រូវបានប្រើប្រាស់ធ្វើជាទ្រនាប់សម្រាប់វាយប្រហារទៅលើទីក្រុងបាដាដពីសំណាក់ក្រុមរដ្ឋអ៊ីស្លាម។
ក្រុមជីហាដនេះ កាលពីល្ងាចថ្ងៃសៅរ៍ម្សិលមិញ បានប្រកាសទទួលខុសត្រូវចំពោះការបំផ្ទុះគ្រាប់បែកនេះ។
ចំណែកទីភ្នាក់ងារព័ត៌មាន AP របស់អាមេរិក រាយការណ៍ថា ភាគច្រើនអ្នកដែលស្លាប់នៅក្នុងវាយប្រហារនោះ គឺជាកុមារ៕
