អង្គការក្រៅរដ្ឋាភិបាលដែលឃ្លាំមើលសិទ្ធិមនុស្សកត់សំគាល់ថា សំឡេងរិះគន់នៅកម្ពុជាកំពុងត្រូវបានរដ្ឋាភិបាលព្យាយាមបិទបាំង និងរំលោភបំពាន ខណៈដែលការបោះឆ្នោតឆ្នាំ២០១៨កាន់តែខិតជិតចូលមកដល់។
សម្ព័ន្ធខ្មែរជំរឿន និងការពារសិទ្ធិមនុស្សហៅកាត់ថា លីកាដូ បានចេញរបាយការណ៍របស់ខ្លួននៅថ្ងៃនេះ ដោយបានរកឃើញថាសំឡេងរិះគន់រដ្ឋាភិបាលកំពុងតែត្រូវបានរដ្ឋាភិបាលរំលោភបំពាន បាត់បង់ និងគំរាមកំហែងតាមរយៈការប្រើប្រាស់ប្រព័ន្ធតុលាការចាប់ដាក់ពន្ធនាគារ ការប្រើប្រាស់ហិង្សាដែលគាំទ្រដោយអាជ្ញាធរ និងការប្រើប្រាស់ច្បាប់ថ្មី និងវិសោធនកម្ម ដែលគោលដៅទាំងនោះគឺសំដៅទៅលើអ្នកការពារសិទ្ធិមនុស្ស និងអ្នកដែលមិនគាំទ្រសកម្មភាពរបស់រដ្ឋាភិបាល។
លីកាដូសរសេរថា «ចាប់តាំងពីឆ្នាំ២០១៥ អ្នកតំណាងសហគមន៍ជាច្រើន មេដឹកនាំសហជីព និងសកម្មជនបរិស្ថាន បានទទួលរងនូវការចោទប្រកាន់ដេលមិនមានមូលដ្ឋានច្បាប់ ការកោះហៅឲ្យបំភ្លឺនៅចំពោះមុខតុលាការ ដែលជាវិធីសាស្ត្របំភិតបំភ័យដើម្បីបំបិទមាត់ និងបញ្ឃប់ភាពសកម្មនិយម និងការជាប់ពន្ធនាគារតាមរយៈការប្រើប្រាស់ប្រព័ន្ធតុលាការកម្ពុជា ដែលមានលក្ខណៈលំអៀង ចំពោះបុគ្គលដែលអាជ្ញាធរយល់ថាជាការគំរាមកំហែងដល់ខ្លួន»។
អង្គការលីការដូ បានលើកឡើងថាការធ្វើទុកបុកម្មេញពីសំណាក់រដ្ឋាភិបាលនេះនឹងអាចបន្តទៀតទៅថ្ងៃអនាគត ហើយនឹងបន្តក្លាយជាផ្នែកមួយនៃកិច្ចប្រឹងប្រែងរបស់អ្នកសិទ្ធិមនុស្ស ដើម្បីការពារសេរីភាពប្រជាពលរដ្ឋដែលធានាដោយរដ្ឋធម្មនុញ្ញកម្ពុជា។
អ្នកនាំពាក្យក្រសួងយុត្តិធម៌លោក ជិន ម៉ាលីន មានប្រសាសន៍ថារដ្ឋាភិបាលធ្វើការអនុវត្តន៍ច្បាប់ស្នើគ្នាៗ ហើយថាការរកឃើញរបស់លីកាដូនេះជាការរកឃើញតែមួយជ្រុងប៉ុណ្ណោះដែលមិនបានសិក្សាស្ថានភាពបច្ចេកទេសផ្លូវច្បាប់។ លោកលើកឡើងថាប្រទេសនីតិរដ្ឋការប្រើប្រាស់ប្រព័ន្ធតុលាការគឺការមធ្យោបាយតែមួយគត់ក្នុងការអនុវត្តន៍ច្បាប់។
លោកថា៖ «សកម្មភាពរបស់អង្គការសង្គមស៊ីវិលគឺត្រូវស្ថិតក្រោមក្រមខ័ណ្ខច្បាប់ ការជួបជុំគ្នា ការបញ្ចេញមតិនោះក៏ស្ថិតក្រោមក្របខ័ណ្ឌច្បាប់ដែរ។ ប្រសិនបើយើងធ្វើសកម្មភាពទាំងអស់នោះលើសពីព្រំដែនកំណត់នៃវិជ្ជាជីវៈរបស់យើងជាសង្គមស៊ីវិល អំពើល្មើសនឹងច្បាប់ព្រហ្មទណ្ឌអញ្ចឹងមានតែ ចំណាត់ការតាមផ្លូវច្បាប់ទេ ហើយឧបករណ៍ដែលបានកំណត់នោះគឺមានតែចំណាត់ការតាមប្រព័ន្ធតុលាការទេដែលអាចកំណត់ថាតើសកម្មភាពនោះវាល្មើសទៅនឹងច្បាប់ឬក៏មិនល្មើសទៅនឹងច្បាប់។ ហើយការប្រើប្រាស់កម្លាំងរបស់អាជ្ញាធរមានសមត្ថកិច្ចជាការប្រើប្រាស់កម្លាំង លើសលប់ជាការរំលោភបំពានទៅលើសេរីភាពរបស់ប្រជាពលរដ្ឋ ឬក៏ជាការប្រើប្រាស់កម្លាំងដែលចាំបាច់ក្នុងការថែរក្សាសន្តិសុខសង្គម»។
ស្ថានភាពសិទ្ធិមនុស្សនៅកម្ពុជាត្រូវបានគេមើលឃើញថា មានការធ្លាក់ចុះធ្ងន់ធ្ងរបន្ទាប់ពីមានការបោះឆ្នោតឆ្នាំ២០១៣មក ខណៈមានចាប់ឃុំខ្លួនមន្រ្តីសិទ្ធិមនុស្សអាដហុកដែលត្រូវបានដោះលែងថ្មីៗនេះ។
អតីតតំណាងពិសេសនៃអង្គការសហប្រជាជាតិដែលបានធ្វើការនៅកម្ពុជាពីឆ្នាំ២០០៥ដល់២០០៨ លោក យ៉ាស ហ្គាយ ធ្លាប់បានវាយតម្លៃថាស្ថានភាពសិទ្ធិមនុស្ស និងនយោបាយនៅកម្ពុជាថានៅឆ្នាំ២០១៦ ស្ថានភាពសិទ្ធិមនុស្ស អាក្រក់ជាងពេលដែលទើបតែផ្តួលរំលំរបបខ្មែរក្រហមទៅទៀត។លោកលើកឡើងដូចនេះដោយសំអាងលើការចាប់ខ្លួនមន្ត្រីសិទ្ធិមនុស្ស មេដឹកនាំសហគមន៍ និងការធ្វើបុកទុក្ខម្នេញបក្សប្រឆាំង ការបង្កើតច្បាប់ថ្មីៗនានាដូចជា ច្បាប់សហជីព ច្បាប់គ្រប់គ្រងអង្កការសង្គមស៊ីវិល និងគម្រោងច្បាប់ស្តីពីគ្រប់គ្រងអ៊ិនធើណែតជាដើម ដែលទាំងអស់នេះលោកថាបានគំរាមកំហែង បំបិទសំឡេងសង្គមស៊ីវិល និងធ្វើឲ្យអន្តរាយដល់ការចូលរួមរបស់ប្រជាពលរដ្ឋក្នុងដំណើរការប្រជាធិបតេយ្យកម្ពុជាផងដែរ។ តែទោះជាយ៉ាងណាការលើកឡើងនេះត្រូវបានគណបក្សប្រជាជនច្រានចោល៕
