សកម្មជនដីធ្លីនៅតំបន់បឹងកក់ អះអាងថា ពួកគេនឹងដាក់ញត្តិនៅតាមស្ថាប័នអន្តរជាតិមួយចំនួន ឲ្យអន្តរាគមន៍ទៅរដ្ឋាភិបាលកម្ពុជាដើម្បីឲ្យដោះលែងតំណាងពួកគេ ដោយថា អ្នកស្រី ទេព វន្នី មិនបានប្រព្រឹត្តិកំហុសដូចតុលាការចោទប្រកាន់ឡើយ។
ការលើករបស់សកម្មជនដីធ្លីគឺបន្ទាប់ពីមន្រ្តីសិទ្ធិមនុស្សអាដហុក និងមន្រ្តី គជប ត្រូវបានដោះលែង ហើយថាអ្នកស្រី ទេព វន្នី ជាមនុស្សម្នាក់ដែលសកម្មចេញមុខទាមទារឲ្យដោះអ្នកអ្នកទាំងនោះផងដែរ។
តំណាងសហគមន៍បឹងកក់អ្នកស្រី ប៊ូវ សោភា ប្រាប់វីអូឌីនៅថ្ងៃចន្ទនេះថា ពួកគាត់គ្រោងនឹងធ្វើយុទ្ធនាការជាទ្រង់ទ្រាយធំក្នុងពេលឆាប់ៗនេះ ដោយដើរដាក់ញត្តិនៅតាមស្ថាប័នអន្តរជាតិ ដើម្បីជួយជំរុញទៅរដ្ឋាភិបាលឲ្យដោះលែងតំណាងពួកគេ ហើយសម្រាប់ការធ្វើយុទ្ធនាការថ្ងៃចន្ទពណ៌ខ្មៅនោះពួកគាត់នៅតែធ្វើដដែល ប្រសិនបើរដ្ឋាភិបាលនៅមិនទាន់ដោះលែងអ្នកស្រី ទេព វន្នី ។
អ្នកស្រីថា «ពួកខ្ញុំមិនទាន់ដឹងទេ ដោយសារ ពួកខ្ញុំថាធ្វើយុទ្ធនាការក្នុងសប្ដាហ៍នេះ ប៉ុន្តែពេលឃើញលទ្ធល្អសម្រាប់សង្គមស៊ីវិលពួកខ្ញុំគិតរកយុត្តិសាស្ត្រថ្មីទៀត តើពួកខ្ញុំអាចនឹងធ្វើអ្វីផ្សេងៗ ហើយថ្ងៃនេះដែរ ពួកខ្ញុំនឹងទៅជួបអ្នកស្រី ទេព វន្នី នៅពន្ធនាគារ នៅម៉ោងថ្ងៃនេះ។ តើគាត់ចង់បានអ្វីបន្ថែមទៀត សម្រាប់ពួកយើងធ្វើ អ្វីដែលពួកយើងទន្ទឹងរងចាំសាលាដំបូងរាជធានីភ្នំពេញ នឹងបញ្ជូនសំណុំអ្នកស្រីទេព វន្នីទៅសាលាឧទ្ធរណ៍ក្នុងពេលឆាប់ៗនេះ ព្រោះអីវានីតិវិធីច្រើនណាស់មកហើយ ទៅដល់សាលាឧទ្ធរណ៍ដែលមិនបានផ្ដល់យុត្តិធម៌ដល់អ្នកស្រី ទេព វន្នី»។
អ្នកស្រីបន្តថា ការនៅបន្តឃុំខ្លួនអ្នកស្រី ទេព វន្នី នេះ មិនបានចំណេញទៅរដ្ឋាភិបាលនោះទេ មានតែធ្វើឲ្យគណបក្សប្រជាជនកម្ពុជាធ្លាក់ឆ្នោតបន្តទៀត ដោយថា អ្នកស្រី ទេព វន្នី មិនបានប្រព្រឹត្តដូចតុលាការចោទប្រកាន់ឡើយ។
អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា មានប្រសាសន៍ថា រដ្ឋាភិបាលគ្មានសិទ្ធិលូកដៃក្នុងរឿងប្រព័ន្ធតុលាការឡើយ។
លោកថា «បងចង់ជម្រាបថាបងនៅខាងគណបក្សបងអត់មានចម្លើយសម្រាប់រឿងតុលាការនឹងរឿងផង»។
អ្នកនាំពាក្យសមាគមអាដហុកលោក សំ ចាន់គា មានប្រសាសន៍ថា ការបន្តឃុំខ្លួនអ្នកស្រី ទេព វន្នី មិនបានចំណេញអ្វីឡើយ។ លោកបន្តថា ប្រសិនបើរដ្ឋាភិបាលនៅតែមិនដោះលែង អ្នកស្រី ទេព វន្នី វានឹងធ្វើប៉ះពាល់មុខមាត់រដ្ឋាភិបាលនៅលើឆាកអន្តរជាតិ។
លោកថា «វាប៉ះពាល់ខ្លះរួចមកហើយ ចឹងហើយរដ្ឋាភិបាលលោកគួរតែពិចារណាទៅ ហើយលោកគួរតែអធ្យាស្រ័យ ហើយធ្វើការដោះលែងអ្នកស្រី ទេព វន្នី ឲ្យមានសេរីភាពទៅ ពីព្រោះការឃុំខ្លួនអ្នកស្រី ទេព វន្នី ម្នាក់ឯងក៏វាអត់មានបានផលអីក្នុងការបង្រ្កាបអ្នកដទៃមិនឲ្យហានបញ្ចេញមតិដែរ»។
អ្នកស្រី ទេព វន្នី ត្រូវបានសាលាដំបូងរាជធានីភ្នំពេញកាត់ទោស កាលពីចុងខែកុម្ភៈឆ្នាំ២០១៧ ដាក់ពន្ធនាគារចំនួន២ឆ្នាំកន្លះ ដោយអាជ្ញាធរចោទថា ប្រើអំពើហិង្សាលើសន្តិសុខខណ្ឌដូនពេញពីរនាក់ឲ្យរងរបួស កាលពីថ្ងៃទី១៣ខែមីនាឆ្នាំ២០១៣។ ស្រ្តីសកម្មជនដីធ្លីរូបនេះ ត្រូវបានអាជ្ញាធរចាប់បញ្ជូនទៅឲ្យតុលាការកាត់ទោស៣ដងរួចហើយ។ ករណីនេះ ក្រុមសកម្មជនដីធ្លីនិងអង្គការសិទ្ធិមនុស្ស ចាត់ទុកសាលក្រមនោះថា មិនមានយុត្តិធម៌៕