អភិបាលខេត្ត​ថាមិនមានការលក់ដូរអនាធិបតេយ្យ​នៅផ្សារសិរីសោភ័ណទេ

អភិបាលខេត្តបន្ទាយមានជ័យបកស្រាយថា មិនមានអាជីវករលក់ដូរអនាធិបតេយ្យ​នៅជុំវិញផ្សារសិរីសោភ័ណ នៅក្នុងខេត្តនេះនោះទេ ដោយថា ផ្សារនោះតូចមានអ្នកលក់តិចតួចតែប៉ុណ្ណោះ។​

ថ្មីៗនេះពលរដ្ឋមួយចំនួនរស់នៅទីនោះបានប្រាប់គេហទំព័រអគ្គស្នងការដ្ឋាននគរបាលជាតិ​ថា អាជីវករបាន​លក់ដូរឥវ៉ាន់​លើចំណីផ្លូវបង្ករការកកស្ទះពិបាកក្នុងការធ្វើដំណើរឆ្លងកាត់​។​

អភិបាលខេត្តបន្ទាយមានជ័យ លោក សួន បវរ បកស្រាយបញ្ហានេះថា ការលើកឡើងនោះជារឿងមិនពិតទេ ព្រោះលោកថា ផ្សារសិរីសោភ័ណមិនមានអ្នកលក់ដូរច្រើនបណ្តាលឲ្យកកស្ទះដូចការចោទប្រកាន់នោះទេ។​

ប៉ុន្តែមន្ត្រីឃ្លាំមើលសិទ្ធិមនុស្សអាដហុកប្រចាំខេត្តបន្ទាយមានជ័យ លោក ស៊ុំ ចន្ទគា អះអាងថា នៅទីនោះមានការលក់ដូរអនាធិបតេយ្យដូចការលើកឡើងរបស់ប្រជាពលរដ្ឋមែន។ លោកថា បញ្ហានេះ មិនឃើញមានមន្ត្រីចុះទៅរៀបចំនោះទេ៕

ម៉ាប់ ស៊ុយ [email protected]