លោកនាយករដ្ឋមន្ត្រី ហ៊ុន សែន ប្រកាសដកខ្លួនចេញពីការអះអាងថា នឹងប្រើគល់ឫស្សីវាយ ក្បាលអ្នកតវ៉ាប្រឆាំងលទ្ធផលបោះឆ្នោត នៅពេលខាងមុខ។
ការបកស្រាយរបស់ប្រមុខរដ្ឋាភិបាលនៅថ្ងៃនេះ គឺបន្ទាប់ពីប្រព័ន្ធផ្សព្វផ្សាយបានដកស្រង់សំដី រដ្ឋមន្ត្រីក្រសួងសង្គមកិច្ច លោក វង សូត ដោយថា តាមការណែនាំរបស់លោកនាយករដ្ឋមន្ត្រី គឺត្រូវទប់ស្កាត់មិនឲ្យអ្នកធ្វើបាតុកម្មប្រឆាំងលទ្ធផលបោះឆ្នោតនៅឆ្នាំ២០១៨នេះទេ ហើយបើមានការតវ៉ា លោក វង សូត បាននិយាយថា «នឹងប្រើគល់ឫស្សីវាយក្បាលអ្នកតវ៉ា»។
ប៉ុន្តែក្នុងពិធីសំណេះសំណាលជាមួយក្រុមកីឡាករ ក្នុងរាជធានីភ្នំពេញ នាថ្ងៃទី៣ខែសីហានេះ លោក ហ៊ុន សែន បានថ្លែងថា នៅពេលប្រជុំបក្សនោះ លោកមិនបាននិយាយថាប្រើគល់ឫស្សី វាយសំពងអ្នកតវ៉ា ដូច លោក វង សូត និយាយនោះទេ ប៉ុន្តែលោក ហ៊ុន សែន ថាគណបក្សកាន់អំណាចពិតជាមានគម្រោងបង្ក្រាបទៅលើក្រុមអ្នកតវ៉ាពិតប្រាកដមែន។
លោកថា៖ «ឮគេផ្សាយថា វង សូត វាយក្បាលគេនឹងគល់ឫស្សីម៉េច។ អត់ទេ ខ្ញុំគ្រាន់តែនិយាយអញ្ចេះ ខ្ញុំថាមិនឲ្យសភាពការ២០១៣វិលវិញទេសុំទោសដាក់ហើយ។ កុំធ្វើផ្តេសផ្តាស តិចថាចង់បានធ្វើអនុប្រធានព្រឹទ្ធសភា ធ្វើបាតុកម្មត្រូវហើយគ្មានទុកទេ។ ចង់បានស្អីអ្នកឯងចង់ធ្វើបាតុកម្មហ្អេស ចុះគណបក្សដែលឈ្នះឆ្នោតគ្មានសិទ្ធិធ្វើបាតុកម្មទេអី សូមព្រមានទុកឲ្យហើយ គេក៏មានសិទ្ធិដែរ។ រួចហើយបើអ្នកឯងតដៃ អាហ្នឹងរឿងតដៃ វាប៉ះគ្នា»។
ការលើកឡើង របស់លោក វង សូត នេះជំរុញឲ្យមានប្រតិកម្មរិះគន់ពីសង្គមស៊ីវិលជាតិនិងអន្តរជាតិ ថាជាការប្រមាថលើពលរដ្ឋខ្លួនឯង និងថារដ្ឋាភិបាលកំពុងដើរផ្ទុយពីគន្លងប្រជាធិបតេយ្យ ធ្លាក់ទៅរករបបផ្តាច់ការ។
នាយករងប្រចាំអាស៊ី នៃអង្គការឃ្លាំមើលសិទ្ធិមនុស្សអន្តរជាតិ លោក ភីល រ៉ូបឺតសុន បានសេចក្តីថ្លែងការណ៍ទទូចឲ្យរដ្ឋាភិបាលដកលោក លោក វង សូត ចេញពីតំណែង និងហៅសុន្ទរកថារបស់រដ្ឋមន្រ្តីរូបនេះថា«ជាសារដ៏ឃោរឃៅរបស់គាត់ដែលបង្ហាញថាគាត់មិនដឹងអ្វីទាំងអស់អំពីសិទ្ធិមនុស្សឬប្រជាធិបតេយ្យ»។
ប៉ុន្តែលោក ហ៊ុន សែន បានថ្លែងការពារលោក វង សូត ដោយប្រតិកម្មនឹងការទាមទារ របស់អង្គការអន្តរជាតិមួយនេះ។
លោកថា៖ «ហើយអាអ្នកទាមទារឲ្យ វង សូត លាលែងពីតំណែង អាហ្នឹងក្រែងវា ជនជាតិអាមេរិកដែរហ្អេ អាមេរិកកំពុងធ្វើអីរាល់ថ្ងៃហ្នឹងបាតុកម្មបាញ់នេះ បាញ់នោះពេញហ្នឹង។ បើចង់អាណាធិបតេយ្យបែបអាមេរិក សូមអ្នកឯងទុកអាណាធិបតេយ្យនៅក្នុងប្រទេសអាមេរិកទៅ កុំនាំអាណាធិបតេយ្យចូលប្រទេសខ្ញុំ។ មិនអាចហៅអាហ្នឹងថា ប្រជាធិបតេយ្យនិងសិទ្ធិមនុស្សទេ»។
អ្នកវិភាគនយោបាយ លោក ឆាំ ប៊ុនថេត លើកឡើងថា ភាសាគំរាម ប្រមាថគ្នា របស់អ្នកនយោបាយពេលនេះ ហាក់បានបង្ហាញថា វប្បធម៌លាបពណ៌ឲ្យពលរដ្ឋស្អប់គ្នា នៅតែត្រូវបានគេយកមកប្រើដើម្បីការពារអំណាច បើទោះពីពេលនេះកម្ពុជាប្រកាសថា កំពុងដើរលើគន្លងប្រជាធិបតេយ្យក៏ដោយ។
លោកថា៖ «បើយើងអត់បញ្ឈប់ការប្រើប្រាស់ពាក្យសម្តីអសុរោះបែបនេះទេ សង្គមខ្មែរយើងអាចនឹងបាត់បង់ទៅវិញនៅថ្ងៃណាមួយមិនខានទេ ឲ្យតែយើងនៅប្រើប្រាស់អានយោបាយបែបប្រមាថ លាបពណ៌គំរាមកំហែងសម្លុត ដោយមិនចេះនិយាយគ្នាក្នុងភាពជាមនុស្ស។ ពីព្រោះអាភាសាគ្រហឹម គំរាមកំហែងអីនេះមិនមានជាភាសារបស់មនុស្សទេតាមពិតទៅ វាជាសំឡេងរបស់សត្វធាតុទេ បើមនុស្សយើងចេះនិយាយគ្នា យើងចេះដោះស្រាយគ្នាហើយបាទ»។
ទោះជាយ៉ាងណាលោក ហ៊ុន សែន បានគំរាមដែរថា គណបក្សប្រឆាំងក៏ប្រឈមនឹងការរំលាយចោលដែរបើបានដឹកនាំបាតុកម្មប្រឆាំងលទ្ធផលបោះឆ្នោត ហើយរំលោភទៅនឹងច្បាប់គណបក្សនយោបាយ ដែលលោកស្នើធ្វើវិសោធនកម្ម ទាំងចម្រូងចម្រាសនោះ៕
