សារព័ត៌មានហ្វីលីពីន បានផ្សាយថា ក្រុមអាប៊ូសាយយ៉ាហ្វបានប្រកាសទទួលខុសត្រូវចំពោះការវាយប្រហារនោះ ដែលបានសម្លាប់មនុស្សយ៉ាងតិច ១៤នាក់ និងបណ្ដាលឲ្យរបួសមនុស្ស ៧១នាក់ កាលពីយប់មិញ។
គេហទំព័រសារព័ត៌មាន inquirer.net បានដកស្រង់សម្ដីរដ្ឋមន្ត្រីមហាផ្ទៃហ្វីលីពីន លោក Mike Sueno ដែលបានថ្លែងថា ក្រុមអាប៊ូសាយយ៉ាហ្វ បានប្រកាសទទួលខុសត្រូវចំពោះការបំផ្ទុះគ្រាប់បែកនៅផ្សាររាត្រីមួយ នៅទីក្រុង Davao កាលពីយប់ថ្ងៃសុក្រ។
ជាងនេះទៅទៀត លោក Mike Sueno បន្ថែមថា ការិយាល័យរបស់លោកបានទទួលព័ត៌មាន អំពីលទ្ធភាពនៃការវាយប្រហារបន្ថែមទៀតពីក្រុមភេរវកម្មនេះ នៅថ្ងៃខាងមុខ។
ទីភ្នាក់ងារព័ត៌មានរដ្ឋហ្វីលីពីន បានផ្សាយថា ប្រធានាធិបតី លោក Rodrigo Duterte បានប្រកាសដាក់ប្រទេសជា “រដ្ឋគ្មានច្បាប់” ហើយបញ្ជាទៅប៉ូលិស និងយោធា ឲ្យឆែកឆេរគ្រប់កន្លែង ដើម្បីចាប់ខ្លួនជនដៃដល់៕