បំផ្ទុះ​គ្រាប់​បែក​នៅ​ទីក្រុង Davao សម្លាប់​មនុស្ស​១៤​នាក់ របួស​ ៧១​នាក់

មន្ត្រី​ប៉ូ​លិស​ហ្វី​លីពីន​កំពុង​ស្វែង​រក​ជន​បន្ទុះគ្រាប់បែក(រូបភាពពី​ទីភ្នាក់ងារ​សារព័ត៌មាន CNN)

ប្រធានាធិបតីហ្វីលីពីន លោក Rodrigo Duterte បានដាក់ប្រទេសនៅក្រោមការឡោមព័ទ្ធ កាលពីយប់ថ្ងៃម្សិលមិញ បន្ទាប់ពីការបំផ្ទុះគ្រាប់បែកនៅផ្សារមួយកន្លែងក្នុងទីក្រុង Davao បានសម្លាប់មនុស្សយ៉ាងតិច ១៤នាក់ ហើយបង្កឲ្យមនុស្ស ៧១នាក់ទៀត រងរបួស។ នេះដោយយោងតាមការផ្សាយរបស់ CNN ដែលបានដកស្រង់ការចុះផ្សាយរបស់ទីភ្នាក់ងារព័ត៌មានហ្វីលីពីន នៅថ្ងៃនេះ។

សារព័ត៌មាន CNN បានដកស្រង់សម្ដីលោក Duterte ដែលបានថ្លែងថា ការបំផ្ទុះគ្រាប់បែកនោះ គឺជាទង្វើភេរវកម្ម ហើយបញ្ជាឲ្យប៉ូលិស និងយោធា ស្វែងរករថយន្ត និងមនុស្សបំផ្ទុះគ្រាប់បែក នៅតាមច្រកត្រួតពិនិត្យ។ CNN បានផ្សាយបន្តថា លោក Duterte បានដាក់ប្រទេសឲ្យស្ថិតនៅក្រោម«រដ្ឋគ្មានច្បាប់» ដោយនិយាយថា លោកមិនប្រកាសច្បាប់សឹកនោះទេ និងបានព្យួរចោលអំណាចតុលាការ។

លោក Duterte បានថ្លែងថា៖ «យើងត្រូវតែប្រឈមមុខនឹងមេដឹកនាំភេរវកម្មដ៏អាក្រក់។ យើងនឹងចាត់ទុកជាបញ្ហារបស់ប៉ូលិសក្នុងការប្រយុទ្ធប្រឆាំងនឹងភេរវកម្ម»។

អ្នកនាំពាក្យប៉ូលិសទីក្រុង Davao លោក Catherine Dela Rey បាននិយាយថា ការបំផ្ទុះគ្រាប់បែកនោះ បានកើតឡើងនៅម៉ោងប្រហែល ១០យប់មិញ នៅផ្សាររាត្រី Roxas នៅជិតសាកលវិទ្យាល័យ Ateneo de Davao។

ផ្សារនោះ ត្រូវបានគេដឹងថាទាក់ទាញមនុស្សរាប់ពាន់នាក់។

គេនៅមិនទាន់ដឹងពីមូលហេតុនៃការបំផ្ទុះគ្រាប់បែកនេះនៅឡើយទេ ប៉ុន្តែ អ្នកនាំពាក្យប្រធានាធិបតី លោក Martin Andanar និយាយថា គ្រឿងបំផ្ទុះដែលគេកែច្នៃ ត្រូវបានគេរកឃើញនៅកន្លែងកើតហេតុ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ