សេចក្ដីរាយការណ៍ពីទីភ្នាក់ងារព័ត៌មានអន្តរជាតិ AFP បានឲ្យដឹងថា មនុស្សដល់ទៅ ៥៩នាក់ ត្រូវបានសម្លាប់ នៅក្នុងអំពើហិង្សាបាញ់ប្រហារដ៏រង្គាលមួយកាលពីថ្ងៃមិញនេះ នៅឯទីក្រុងឡាសវេហ្កាសរបស់អាមេរិក។
AFP បានរាយការណ៍ថា វាគឺជាការបាញ់ប្រហារដ៏បង្ហូរឈាមបំផុតនៅក្នុងប្រវត្តិសាស្ត្រអាមេរិក ហើយក្រុមភេរវកម្មរដ្ឋឥស្លាម បានប្រកាសទទួលខុសត្រូវចំពោះការបាញ់ប្រហារនៅឯការប្រគុំតន្ត្រីមួយ ធ្វើឡើងនៅឡាសវេហ្កាសស្ត្រីប។
ប៉ូលិសអាមេរិក បាននិយាយថា បុរសឈ្មោះ Stephen Craig Paddock អាយុ៦៤ឆ្នាំ បានបំបែកបង្អួចបន្ទប់សណ្ឋាគារនៅជាន់ទី ៣២ កាលពីយប់ថ្ងៃអាទិត្យ ឬត្រូវនឹងថ្ងៃចន្ទនៅកម្ពុជា ហើយជននោះបានប្រើប្រាស់កាំភ្លើងយន្តបើកការបាញ់ប្រហារទៅលើអ្នកចូលរួមទស្សនាការប្រគុំតន្ត្រីនោះ។ ប៉ូលិសអាមេរិកឲ្យដឹងថា ខ្មាន់កាំភ្លើងរូបនោះ គឺជាអតីតគណនេយ្យករដ៏ស្តុកស្ដមម្នាក់។
តារាចម្រៀង Jason Aldean បានរត់ចោលឆាកតន្ត្រី នៅពេលការបាញ់ប្រហារនោះផ្ទុះឡើងនៅប្រហែលម៉ោង ១០យប់ ហើយអ្នកគាំទ្របានរត់គេចខ្លួនប្រសេចប្រសាចទាំងភ័យរន្ធត់ ដើម្បីរកកន្លែងលាក់ខ្លួន ខណៈដែលគ្រាប់កាំភ្លើងត្រូវបានបាញ់ស្រោចដូចទឹកភ្លៀងពីខាងលើមកនោះ។
AFP បានផ្សាយថា ក្រុមភេរវកម្មរដ្ឋឥស្លាម ឬ IS នោះ បានប្រកាសថា ខ្មាន់កាំភ្លើង Paddock គឺជាទាហានម្នាក់របស់ក្រុមនេះ ប៉ុន្តែប៉ូលិស FBI អាមេរិកនិយាយថា ពុំបានរកឃើញទំនាក់ទំនងបែបនោះទេ ហើយប៉ូលិសនៅទីក្រុងឡាសវេហ្កាស បានហៅខ្មាន់កាំភ្លើងរូបនោះថា «ជនវិកលចរិត»។
ប៉ូលិសអាមេរិកនិយាយថា ខ្មាន់កាំភ្លើង Paddock រូបនេះ ពុំមានប្រវត្តិជាប់ទោសឧក្រិដ្ឋនោះឡើយ ហើយរូបគេបានបាញ់សម្លាប់ខ្លួនឯង មុននឹងកងកម្លាំងពិសេសសម្រុកចូលក្នុងបន្ទប់ស្នាក់នៅរបស់គេ ស្ថិតនៅក្នុងសណ្ឋាគារ Mandalay Bay នោះ៕
