មន្ត្រីជាន់ខ្ពស់រដ្ឋាភិបាល ឲ្យដឹងថា កម្ពុជា គ្រោងបង្កើនចំនួនអ្នកទេសចរណ៍ចិនឲ្យកើនដល់ជាង២លាននាក់ នៅឆ្នាំ២០២០ តាមរយៈចំណងទំនាក់ទំនង និងពាណិជ្ជកម្មរវាងប្រទេសទាំងពីរ។
រដ្ឋមន្ត្រីក្រសួងទេសចរណ៍ លោក ថោង ខុន បានបញ្ជាក់បែបនេះ ក្នុងពិធីបើកវេទិកាជាតិលើកទី២ ស្តីពី «ចិនត្រៀមខ្លួនសម្រាប់វិស័យទេសចរណ៍កម្ពុជា» កាលពីថ្ងៃទី៣១ខែតុលា ថា កម្ពុជាបានទទួលភ្ញៀវទេសចរបរទេសចំនួន ៣លាន៥សែននាក់ ក្នុងរយៈពេល៨ខែ ដើមឆ្នាំ២០១៧នេះ ពោលគឺកើនឡើង ១១,៨ ភាគរយ ក្នុងមួយឆ្នាំ ដែលក្នុងនោះ ភ្ញៀវទេសចរជនជាតិចិន មានជិត៨សែននាក់ ដែលកើនឡើង៤៤ភាគរយ។
លោក បានបញ្ជាក់បន្ថែមថា តាមរយៈចំណងទំនាក់ទំនាកទំនងដ៏ល្អរវាងប្រទេសទាំងពីរ វាបានបង្កើនឲ្យមានអ្នកវិនិយោគជាជនជាតិចិន និងភ្លៀវទេសចរណ៍ចិន កើនឡើងជាលំដាប់ ដែលលោករំពឹងថានៅឆ្នាំ២០២០ខាងមុខ កម្ពុជា នឹងទទួលបានភ្លៀវទេសចរណ៍ចិន កើនដល់ជាង២លាននាក់។
កាលពីឆ្នាំមុន កម្ពុជាបានបង្កើតយុទ្ធសាស្ត្រ China Ready ដើម្បីទាក់ទាញអ្នកទេសចរណ៍ជនជាតិចិនឲ្យបានច្រើនមកក្នុងប្រទេស។ យុទ្ធសាស្ត្រនោះ រួមមានការជួយសម្រួលការនាំផ្លូវអ្នកទេសចរណ៍ជនជាតិចិន ដោយអាជ្ញាធរទេសចរណ៍កម្ពុជា តាមរយៈ សញ្ញាប្រាប់ ឬ បញ្ជា និងឯកសារបរិយាយជាភាសាចិន រួមជាមួយការលើកទឹកចិត្តដល់អ្នកលក់ដូរកម្ពុជា ឲ្យប្រើប្រាស់លុយ និងភាសាចិន ជាមួយនឹងអាហារ ដែលសមស្រមជាមួយរសនិយមរបស់ជនជាតិចិនផងដែរ៕
