ពលករខ្មែរម្នាក់នៅកូរ៉េខាងត្បូង ត្រូវបានម៉ាស៊ីនផលិតប្លាស្ទីកកៀបដាច់ដៃខាងស្ដាំ ខណៈពលកររូបនេះកំពុងបម្រើការងារនៅក្នុងរោងចក្រមួយនាព្រឹកថ្ងៃទី ០៣ ខែធ្នូនេះ។
ស្ថានទូតកម្ពុជាប្រចាំនៅប្រទេសកូរ៉េខាងត្បូង បានឱ្យដឹងនៅលើហ្វេសប៊ុករបស់ខ្លួនថា ពលករ ញៀន សុខរិទ្ធី បម្រើការងារផ្នែកឧស្សាហកម្ម នៅទីក្រុងឈ័រណាន (Cheon An) ត្រូវម៉ាស៊ីនកៀបដាច់ដៃម្ខាង បន្ទាប់ពីពលកររូបនោះ បានដួលទៅលើម៉ាស៊ីនផលិតប្លាស្ទីក អំឡុងពេលពលករូបនោះកំពុងបម្រើការងារនៅក្នុងរោងចក្រ។
បើយោងតាមស្ថានទូតខ្មែរនៅកូរ៉េខាងត្បូង ពលកររងគ្រោះ ដែលមានស្រុកកំណើតមកពីស្រុកក្រគរ ខេត្តពោធិ៍សាត់ ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យ Dankook នៅទីក្រុងឈ័រណាន។
ស្ថានទូតខ្មែរប្រចាំនៅកូរ៉េខាងត្បូង បានបញ្ជាក់ថា មន្ត្រីស្ថានទូតកំពុងសហការជាមួយមជ្ឈមណ្ឌលគាំពារពលករបរទេស ដើម្បីជួយពលកររូបនោះ តាមនីតិវិធីច្បាប់៕
