ប្រជាពលរដ្ឋជិត១០០នាក់ដែលមានជម្លោះដីធ្លីជាមួយយោធាយោធភូមិភាគទី៤ នៅស្រុកត្រពាំងប្រាសាទ ខេត្ដឧត្ដរមានជ័យ នាំគ្នាតវ៉ានៅខាងមុខសាលាខេត្ដ ទាមទារឲ្យអាជ្ញាធរដោះស្រាយជម្លោះដីធ្លីនៅព្រឹកថ្ងៃពុធនេះ។
តំណាងប្រជាពលរដ្ឋ៣៥គ្រួសារ នៅភូមិអូរផ្អាវ ឃុំត្រពាំងប្រាសាទលោក គីម ជួន ឲ្យវីអូឌីថាដីស្រែចំការ អ្នកភូមិចំនួន១៥២ហិកតា ដែលមានព្រំប្រទល់ជាប់ខេត្ដសៀមរាបនិងខេត្ដឧត្ដរមានជ័យ ត្រូវបានយោធាយោធភូមិភាគទី៤ រំលោភយកនិងរារាំងមិនឲ្យបង្កបង្កើនផល បើទោះបីពួកគាត់មានចំណារពីមន្ដ្រីរដ្ឋាភិបាលក៏ដោយ។ លោកបន្ដថា អភិបាលស្រុកត្រពាំងប្រាសាទ លោក នៅ សំដារ៉ារិទ្ធ ចុះទៅវាស់វែង ប៉ុន្ដែលោកថាការវាស់វែងនោះបានទៅលើមន្ដ្រីយោធាប៉ុណ្ណោះ។ លោកបញ្ជាក់ថា អាជ្ញាធរបានសន្យាដោះស្រាយជាបន្ដបន្ទាប់ ប៉ុន្ដែគ្មានប្រសិទ្ធភាព។ លោកបន្ដថា៖ «ឲ្យអភិបាលខេត្ដកាត់ឆ្វៀលឲ្យបងប្អូនឲ្យបានគ្រប់គ្នា ឲ្យគាត់បង្កបង្កើនផល ខ្ញុំបានទៅភ្នំពេញ ហើយលោក ជា សុផារ៉ា បានធ្វើលិខិតមួយដាក់មកហើយជួយដោះស្រាយឲ្យប្រជាជន ប៉ុន្ដែអត់ឃើញមានដំណោះស្រាយ ដូចម្សិលមិញអភិបាលស្រុកទៅដោះស្រាយវាស់តែដីភូមិដដែល តែអត់មានអីឲ្យបងប្អូនធ្វើអីបានផងនោះ»។
ពលរដ្ឋមួយរូបទៀត លោក ជឹម ផន ឲ្យដឹងថា ដីធ្លីពួកគាត់បានបង្កបង្កើនផលនិងមានដំណាំជាច្រើនប្រភេទតាំងពីឆ្នាំ២០០១ ប៉ុន្ដែកម្លាំងយោធានៅយោធភូមិភាគទី៤បានកាប់បំផ្លាញចោល ដោយគ្មានផ្ដល់សំណងនោះឡើយ។ លោកបន្ដថា ក្រុមទាហានបានប្រើអាវុធបាញ់គំរាមពលរដ្ឋមិនឲ្យបង្ករបង្កើនផលលើដីរបស់ពួកគេ ទើបពួកគាត់នាំគ្នាតវ៉ាឲ្យអាជ្ញាធរផ្ដល់យុត្ដិធម៌និងផ្ដល់ប័ណ្ណកម្មសិទ្ធិស្របច្បាប់ជួនពួកគេ។ លោកបន្ដថា៖ «បាទគេអត់ឲ្យដាំសោះម៉ង យើងទៅកាត់ស្មៅ គេមកដេញចាប់ដេញបាញ់គំរាមយើងចឹងណាបង។ យើងដៃទទេអត់ហ៊ានខ្លះរត់ទៅគេដកយកម៉ាស៊ីនកាត់ស្មៅ»។
VOD មិនអាចទាក់ទងមេបញ្ជាការយោធភូមិភាគទី៤លោក ជា ម៉ន ដើម្បីសុំការសាកសួរពីករណីនេះបានទេ ខណៈដែលអភិបាលខេត្ដឧត្ដរមានជ័យលោក ស ថាវី ទូរសព្ទមិនមានអ្នកទទួល។
អភិបាលស្រុកត្រពាំងប្រាសាទលោក នៅ សំដារ៉ារិទ្ធ មានប្រសាសន៍ថា ជម្លោះដីពលរដ្ឋនៅតំបន់នោះមានចំនួន១០៧គ្រួសារបានដោះស្រាយរួចហើយ ប៉ុន្ដែនៅសល់ចំនួន៣៥គ្រួសារទៀត ស្ថិតក្នុងឧទ្យានជាតិគូលេនព្រហ្មទេពនិងទីលានបាញ់គ្រាប់ពិតរបស់យោធា យោធភូមិភាគទី៤។ លោកបន្ដថា ដីធ្លីអ្នកភូមិចំនួន៣៥គ្រសារនោះ អាជ្ញាធរព្យាយាមសម្របសម្រួលជាមួយយោធា ប៉ុន្ដែពួកគាត់ចង់មានដំណោះស្រាយភ្លាម។ លោកបន្ដថា៖ «គឺមិនមែនជាដីស្របច្បាប់សម្រាប់បងប្អូនកាន់កាប់ទេ គឺជាដីរបស់រដ្ឋស្ថិតក្នុងតំបន់ឧទ្យានគូលេនព្រហ្មទេព ចឹងហើយសុំឲ្យបងប្អូនធ្វើការសម្របសម្រួលហើយការដោះស្រាយមិនមែនដោះស្រាយតែមួយថ្ងៃចប់ទេនិងមិនបានទំហំដែលគាត់ចង់បានដែរវាស្រ័យទៅលើការងារថ្នាក់ខេត្ដនិងថ្នាក់ភូមិភាគគាត់ចរចាគ្នា ប៉ុន្ដែគាត់ឡើងទៅទៀតមិនដឹងធ្វើម៉េចទេ»។
ទោះជាយ៉ាងណា អ្នកសម្របសម្រួលសមាគមការពារសិទ្ធិមនុស្សអាដហុក ខេត្ដឧត្ដរមានជ័យលោក ស្រី ណារ៉េន ឲ្យដឹងថាជម្លោះដីធ្លីនៅតំបន់នោះ អភិបាលស្រុកត្រពាំងប្រាសាទ លោក នៅ សំដារ៉ារិទ្ធ ព្យាយាមដោះស្រាយជួនពលរដ្ឋប្រសើរជាងមុន។ ប៉ុន្ដែយ៉ាងនេះក្ដីលោកជំរុញឲ្យអាជ្ញាធរជួយដោះស្រាយឲ្យមានប្រសិទ្ធភាព ដើម្បីកាត់បន្ថយជម្លោះនិងឲ្យពួកគេបង្កបង្កើនផលស្របច្បាប់។
បើតាមពលរដ្ឋឲ្យដឹងថា ជម្លោះដីធ្លីនេះកើតឡើងតាំងពីឆ្នាំ២០០៣ និងបានស្វែងរកដំណោះស្រាយដល់រាជធានីភ្នំពេញជាបន្ដបន្ទាប់ ប៉ុន្ដែគ្មានដំណោះស្រាយ៕
