រដ្ឋាភិបាលប្រកាសនិរាករណ៍គណៈកម្មការអន្តរក្រសួងដែលធ្វើការត្រួតពិនិត្យ វាស់វែងនិងវាយតម្លៃសម្បទានដីសេដ្ឋកិច្ច ក្រោយពីបានបញ្ចប់ការងារពិនិត្យមើលក្រុមហ៊ុនដែលទទួលបានដីសម្បទានសេដ្ឋកិច្ចកាលពីកន្លងមក។
នៅក្នុងសេចក្តីសម្រេចមួយចុះថ្ងៃទី១ខែមីនា ឆ្នាំ២០១៦ លោកនាយករដ្ឋមន្រ្តី ហ៊ុន សែន បានសម្រេចថានិរាករណ៍សេចក្តីសម្រេចចុះថ្ងៃទី១៨ខែសីហា ឆ្នាំ២០១៤ របស់រដ្ឋាភិបាលស្តីពីការបង្កើតគណៈកម្មការអន្តរក្រសួងដើម្បីត្រូវពិនិត្យ វាស់វែង និងវាយតម្លៃសម្បទានដីសេដ្ឋកិច្ច។
កាលពីថ្ងៃទី២៥ខែកុម្ភៈ លោកនាយករដ្ឋមន្ត្រី ហ៊ុន សែន បានថ្លែងឲ្យដឹងថាតាមរយៈការធ្វើកំណែទម្រង់ឡើងវិញពាក់ព័ន្ធនឹងបញ្ហាដីសម្បទានសេដ្ឋកិច្ច រហូតមកដល់ពេលនេះ រដ្ឋាភិបាលបានពិនិត្យមើលទៅលើដីសម្បទានសេដ្ឋកិច្ចរួចរាល់អស់ហើយ ទាំងផ្នែកកសិកម្ម និងផ្នែកបរិស្ថាន ដែលលោកថាមានផ្ទៃដីសរុបជាង២លានហិកតា។ លោកបន្តថារដ្ឋាភិបាលបានដកហូតដីសម្បទានសេដ្ឋកិច្ចជិតមួយលានហិកតាទៅគ្រប់គ្រងវិញ ក្នុងចំណោមដីជាង២លានហិកតាដែលរដ្ឋាភិបាលបានផ្ដល់ទៅឲ្យក្រុមហ៊ុន។
លោកមានប្រសាសន៍ថា៖ “ក្នុងចំនួន២លានហិកតាជាងនេះ ឥឡូវបន្សល់ទុកឲ្យបន្តវិនិយោគតែ១លាន៩ម៉ឺនហិកតាទេ ជិត១លានហិកតាទៀតបានដកហូតយកមកវិញហើយ។ ហើយក្នុង១លានហិកតានេះ (ដែលបន្តឲ្យវិនិយោគ) ភាគច្រើនគឺជាដីបានដាំដុះដំណាំកៅស៊ូ ឬក៏ដំណាំអីផ្សេងៗរួចស្រេចទៅហើយ”។
លោក ហ៊ុន សែន បន្តថា សម្រាប់ដីជាង១លានហិកតាដែលរដ្ឋាភិបាលបន្តឲ្យវិនិយោគនោះ ក្រុមហ៊ុនត្រូវធ្វើការដោះស្រាយផលប៉ះពាល់ជាមួយប្រជាពលរដ្ឋ ដោយលោកថា រដ្ឋាភិបាលអាចនឹងបន្តដកហូតយកដីទាំងនោះទៅគ្រប់គ្រងវិញ។
កាលពីឆ្នាំ២០១២ រដ្ឋាភិបាលបានសម្រេចផ្អាកការផ្ដល់ដីសម្បទានសេដ្ឋកិច្ចដល់ក្រុមហ៊ុន ដោយបញ្ជាឲ្យពិនិត្យមើលឡើងវិញលើដីសម្បទានសេដ្ឋកិច្ចដែលត្រូវបានផ្ដល់រួចហើយ។ នៅក្នុងឆ្នាំ២០១៥ រដ្ឋាភិបាលក៏បានសម្រេចបន្ថយរយៈពេលនៃដីសម្បទានទាំងអស់ពី៩០ឆ្នាំមកនៅ៥០ឆ្នាំ។
មន្ត្រីសម្របសម្រួលគម្រោងកំណែទម្រង់ដីធ្លីរបស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថារដ្ឋាភិបាលបានដកហូតដីមួយចំនួនពីក្រុមហ៊ុនដែលមិនបានគោរពតាមច្បាប់ តែថា តាមការសង្កេតរបស់លោកគឺដីភាគច្រើនដែលរដ្ឋាភិបាលបានដកហូតយកពីក្រុមហ៊ុនវិញជាដីដែលអស់ប្រយោជន៍។ លោកថា៖ “រដ្ឋាភិបាលបានដកហូតមែន ក៏ប៉ុន្តែការដកហូតហ្នឹងវាទាក់ទងនឹងដីខ្លះដែលអស់ប្រយោជន៍ហើយ ដូចជាដីសម្បទានសេដ្ឋកិច្ចមួយចំនួនដែលវាអស់ព្រៃឈើ ហើយដែលគេទុកដីទំនេរចោលហ្នឹង ហើយដីមួយចំនួនទៀតហ្នឹងក៏វាមានទាក់ទងនឹង ការដែលត្រូវផ្ទេរមករដ្ឋាភិបាលគឺថាក្រុមហ៊ុនហ្នឹងគឺថា ជញ្ជក់យកជីជាតិអស់ហើយ បើនិយាយទៅយកផលប្រយោជន៍អស់ហើយ”។
លោក វណ្ណ សុផាត បន្តថាក្នុងការផ្ដល់ដីសម្បទាននាពេលកន្លងមក រដ្ឋាភិបាលបានសិក្សាពីផលប៉ះពាល់ផ្នែកបរិស្ថាននិងសង្គមនោះទេ ដែលលោកថាបញ្ហានេះបណ្ដាលឲ្យមានផលប៉ះពាល់ដល់ប្រជាពលរដ្ឋនៅក្នុងមូលដ្ឋាន។ លោកថា តាមការសង្កេតរបស់លោក ជម្លោះដីធ្លីភាគច្រើនដែលកើតពីដីសម្បទានសេដ្ឋកិច្ចនេះនៅពុំទាន់ត្រូវបានដោះស្រាយនៅឡើយទេ ដោយលោកជំរុញឲ្យរដ្ឋាភិបាលរកដំណោះស្រាយដល់ប្រជាពលរដ្ឋឲ្យបានឆាប់។
យ៉ាងណាក៏ដោយ លោក ហ៊ុន សែន បានថ្លែងថាលោកសង្ឃឹមថានៅពេលដែលដំណាំកៅស៊ូ និងដំណាំផ្សេងៗដែលដាំដុះនៅលើដីសម្បទានសេចដ្ឋកិច្ចទាំងនោះនឹងក្លាយទៅជាគម្របព្រៃថ្មី ដែលលោកថានឹងផ្ដល់ផលជាគម្របព្រៃឈើផង និងផលប្រយោជន៍សេដ្ឋកិច្ចផង។ លោកនាយករដ្ឋមន្ត្រីបានថ្លែងទៀតថា ដីសម្បទានដែលត្រូវបានដកហូតយកវិញទាំងនោះបច្ចុប្បន្នស្ថិតក្រោយការគ្រប់គ្រងរបស់ក្រសួងកសិកម្ម និងក្រសួងបរិស្ថាន ប៉ុន្តែលោកថា ដីទាំងនោះគឺជាគោលដៅនៃដីសម្បទានសង្គមកិច្ចសម្រាប់ចែកជូនដល់ប្រជាពលរដ្ឋ៕
