មេដឹកនាំវ័យក្មេងរបស់កូរ៉េខាងជើងថ្លែងនៅថ្ងៃសុក្រនេះថាឃ្លាំងអាវុធនុយក្លេអ៊ែត្រូវត្រៀមជាស្រេចសម្រាប់ប្រើគ្រប់ពេលនៅទូទាំងប្រទេសដើម្បីវាយប្រហារមុនការពារការវាយពីសត្រូវ។
ការព្រមានរបស់មេដឹកនាំកូរ៉េខាងជើងរបៀបនេះធ្វើឡើងបន្ទាប់ពីក្រុមប្រឹក្សាសន្តិសុខអង្គការសហប្រជាជាតិបានអនុម័តដាក់ទណ្ឌកម្មបន្ថែមលើទីក្រុងព្យុងយ៉ាងនៅក្នុងសប្តាហ៍នេះ។
មេដឹកនាំកូរ៉េខាងជើងលោក គីម ជុងអ៊ុន ថ្លែងថាអាវុធនុយក្លេអ៊ែត្រូវត្រៀមសម្រាប់ការធ្វើសង្គ្រាមគ្រប់ពេល។ នេះបើតាមភ្នាក់ងារព័ត៌មាន KCNA របស់កូរ៉េខាងជើង។
លោក គីម ក៏បានព្រមានថាក្នុងស្ថានភាពនេះនឹងកាន់តែបង្កភាពតានតឹងធ្វើឲ្យឧបទ្វីបកូរ៉េក្លាយជាតំបន់កាន់តែមានគ្រោះថ្នាក់ ហើយកូរ៉េខាងជើងចាំបាច់ត្រូវចាប់យកយុទ្ធសាស្ត្រប្រើយោធាដើម្បីត្រៀមវាយការពារ។
ទោះយ៉ាងណាគេកត់សម្គាល់ថាវាជាទម្លាប់ទៅហើយដែលកូរ៉េខាងជើងតែងតែព្រមានពីការផ្ទុះសង្គ្រាមឡើងនៅពេលមានភាពតានតឹងឬមានការដាក់សម្ពាធពីសហគមន៍អន្តរជាតិនោះ។
កាលពីថ្ងៃពុធសប្តាហ៍នេះក្រុមប្រឹក្សាសន្តិសុខអង្គការសហប្រជាជាតិទាំង១៥ប្រទេសបានសម្រេចអនុម័តការដាក់ទណ្ឌកម្មថ្មីទៀតលើប្រទេសកូរ៉េខាងជើងដោយសារកូរ៉េខាងជើងបានបាញ់សាកល្បងអាវុធនុយក្លេអ៊ែលើកទី៤របស់ខ្លួនកាលពីថ្ងៃទី៦ខែមករានិងបាញ់រ៉ុកែតថ្ងៃទី៧ខែកុម្ភៈ៕
