ឥណ្ឌូនេស៊ីប្រកាសរដ្ឋក្នុងភាពអាសន្នករណីលេចធ្លាយនិងឆេះប្រេង

រដ្ឋាភិបាលឥណ្ឌូនេស៊ីប្រកាសដាក់រដ្ឋក្នុងស្ថានភាពប្រកាសអាសន្ន ដោយសារបញ្ហាការលេចធ្លាយប្រេងនិងឆេះឡើងនៅក្នុងឆ្នេរសមុទ្រនៅក្បែរកោះប័ណេអូ(Borneo)។​

តាមការចុះផ្សាយរបស់សារព័ត៌មានBBC ការលេចធ្លាយនិងឆេះប្រេងនេះកើតឡើងតាំងពីថ្ងៃសៅរ៍ចុងសប្តាហ៍មុន​ ហើយបានបណ្តាលឲ្យអ្នកនេសាទចំនួន​៤នាក់បានស្លាប់នៅកំពង់ផែនៃទីក្រុងបាលីកផាផាន(Palikpapan)។​

អាជ្ញាធរបានថ្លែងថា ពួកគេមិនទាន់បានដឹងច្បាស់ពីមូលហេតុនៃការលេចធ្លាយនេះនៅឡើយ ចំណែកចំនួនការធ្លាយ និងឆេះកាន់តែកើនឡើង។​ ចំណែកប្រជាពលរដ្ឋកំពុងតែមានបញ្ហាប៉ះពាល់ផ្នែកសុខភាពដូចជា ពិបាកដកដង្ហើម វិលមុខចងក្អួតចង្អោរជាដើម​។ មន្ត្រីជំនាញរកឃើញថា បញ្ហាសុខភាពប្រជាពលរដ្ឋនេះកើតឡើងចាប់តាំងពីភ្លើងឆេះប្រេងនោះ។​

ការលេចធ្លាយប្រេងនេះ ក៏កំពុងតែគំរាមកំហែងដល់ជីវិតសត្វនៅក្នុងទឹកសមុទ្រដែរ កំពុងតែរាលដាលក្នុងផ្ទៃសមុទ្រចំនួន​១២គីឡូម៉ែត្រ។​