ក្រុមឧទ្ទាមបំបែកខ្លួននៅក្នុងប្រទេសហ្វីលីពីនបានបញ្ចេញសារព្រមានថ្មីមួយទៀតកាលពីថ្ងៃអង្គារម្សិលមិញ ដោយបានគំរាមកំហែងសម្លាប់ចំណាប់ខ្មាំង៣នាក់ បន្ទាប់ពីពួកគេបានកាត់ក្បាលចំណាប់ខ្មាំងមួយរូបកាលពីជាង១សប្ដាហ៍មុន។
កងទ័ពជើងទឹកហ្វីលីពីនបានល្បាតលើផ្លូវធំមួយនៅលើកោះមិនដាណាវ ស្ថិតនៅភាគខាងត្បូងរបស់ហ្វីលីពីន ចាប់តាំងពីថ្ងៃទី១៤ ខែមេសា ឆ្នាំ២០១០កន្លងមក ខណៈដែលពួកគេបន្តប្រមាញ់ពួកឧទ្ទាម។
ទីភ្នាក់ងារព័ត៌មាន AFP បានរាយការណ៍ថាមនុស្ស៣នាក់ក្នុងនោះមានជនជាតិកាណាដា ជនជាតិណ័រវេ និងហ្វីលីពីនបានអំពាវនាវរកការជួយសង្គ្រោះពីប្រទេសហ្វីលីពីននិងរដ្ឋាភិបាលកាដាណា តាមរយៈវីដេអូមួយដែលត្រូវបានគេបង្ហោះចូលប្រព័ន្ធ YouTube កាលពីថ្ងៃអង្គារម្សិលមិញ។
បុរសជនជាតិកាណាដាឈ្មោះ Robert Hall បាននិយាយក្នុងវីដេអូនោះថាជនចំណាប់ខ្មាំងបានប្រាប់លោកឲ្យប្រាប់ទៅរដ្ឋាភិបាលហ្វីលីពីនធ្វើតាមការទាមទាររបស់ពួកគេ ប៉ុន្តែពុំបានបញ្ជាក់ថាពួកឧទ្ទាមចង់បានអ្វីឲ្យប្រាកដនោះឡើយ។
ក្រុមអាប៊ូសាយយ៉ាស់ដែលមានមូលដ្ឋាននៅភាគខាងត្បូងហ្វីលីពីនបានប្រកាសកាលពីសប្ដាហ៍មុនថា ពួកគេបានសម្លាប់ចំណាប់ខ្មាំងជនជាតិកាណាដាម្នាក់ឈ្មោះ John Ridsdel នៅពេលឱសានវាទបានកន្លងផុតទៅកាលពីថ្ងៃទី២៥ខែមេសាកន្លងមកនេះ។
ចំណែកឯបុរសជនជាតិណ័រវេសនិងនារីជនជាតិហ្វីលីពីនដែលជាមិត្តស្រីរបស់លោក Robert Hall ក៏បានអំពាវនាវទៅដល់រដ្ឋាភិបាលប្រទេសទាំងពីរផងដែរ។
វីដេអូនោះបានបង្ហាញពួកគេអង្គុយនៅលើដីស្ថិតនៅក្នុងចម្ការដូងមួយកន្លែងនិងមានខ្មាន់កាំភ្លើង៦នាក់ឈរនៅពីក្រោយពួកគេ។
ប្រធានាធិបតីហ្វីលីពីន លោក បេនីកណូ អាហ្គីណូ (Benigno Aquino) បានប្ដេជ្ញាកម្ទេចពួកខ្មាន់កាំភ្លើង ហើយរដ្ឋាភិបាលរបស់លោកនឹងមិនចរចាជាមួយក្រុមនេះឡើយ ដោយបានចាត់ពួកគេជាអង្គការភេរវកម្ម។
នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau) ក៏បាននិយាយផងដែររដ្ឋាភិបាលរបស់លោកនឹងមិនចរចាជាមួយក្រុមឧទ្ទាមនេះផងដែរ។
លោក អាហ្គីណូ បាននិយាយថាក្រុម អាប៊ូ សាយយ៉ាស់ បានចាប់ចំណាប់ខ្មាំងទាំង៣នាក់ឃុំទុកនៅលើកោះ ចូឡូ ដែលស្ថិតនៅចម្ងាយជាង១០០០គីឡូម៉ែត្រពីទីក្រុងម៉ានីល៕
ប្រភព៖ Bangkok Post
