ប្រជាសហគមន៍ផ្លូវដែកជាង៦០នាក់ប្រមូលផ្តុំគ្នានៅមុខសាលារាជធានីភ្នំពេញជាថ្មីទៀត នៅថ្ងៃនេះ ដោយជំរុញទៅអភិបាលស្ថាប័ននេះ ជួយពន្លឿនដោះស្រាយបញ្ហា បង្ហាញគម្រោងអភិវឌ្ឍន៍បណ្តោយផ្លូវដែក ជូនពួកគេឲ្យបានឆាប់។
សហគមន៍ភូមិ២៣អ្នកស្រី នី សន្តោស បានរៀបរាប់ប្រាប់VODនៅមុខសាលារាជធានីភ្នំពេញថា ពួកគេមកជួបជុំគ្នាជាថ្មីទៀត ដោយថាដើម្បីទាមទារឲ្យស្ថាប័ននេះពន្លឿនបង្ហាញគម្រោងអភិវឌ្ឍន៍តាមបណ្តោយផ្លូវដែក ខណៈពួកគេកំពុងជួបបញ្ហាប្រឈមច្រើនពីគម្រោងអភិវឌ្ឍន៍នៅតំបន់នោះ។
អ្នកស្រីនិយាយថា «យើងរងផលប៉ះពាល់ ពិបាកចិត្តតំាងពីរឿងអភិវឌ្ឍន៍ ហើយមិនហ៊ានចេញទៅរកស៊ីទៅណា ដោះស្រាយម៉េច វារងផលប៉ះពាល់នឹងការអភិវឌ្ឍន៍ទៀត គេឈូសឆាយ ខែនេះ[ឧសភា] ធ្វើឲ្យវាមានខ្យល់ មានដីហុយផង ហើយភ្លៀងមក វាពិបាកប៉ះពាល់សុខភាពកូនចៅ ឥឡូវកូនខ្ញុំឈឺចង់ពេញផ្ទះអស់ហើយ ក្អកសុំបីតែខ្លួនខ្ញុំក៏មានបញ្ហាសុខភាពដែរ»។
តំណាងសហគមន៍ទួលសង្កែB លោក ឡុង ចាន់ឌី ដែលបានចូលជួបមន្ត្រីរដ្ឋបាលសាលារាជធានីភ្នំពេញ បានឲ្យដឹងថា មន្ត្រីស្ថាប័ននេះបានប្រាប់ថា កំពុងឲ្យមន្ត្រីបច្ចេកទេសគូសប្លង់ ដោយថានឹងបង្ហាញនៅពេលក្រោយ។ ទោះជាយ៉ាងណា លោកថាមន្ត្រីរដ្ឋបាលរូបនោះមិនបានបញ្ជាក់ច្បាស់ពីពេលវេលាបង្ហាញឬដោះស្រាយជាក់លាក់ជូនសហគមន៍នៅតំបន់ដែលរងផលប៉ះពាល់នោះទេ។
លោកនិយាយថា «អ្វីដែលយើងចង់បានឲ្យបង្ហាញពីពេលវេលាជាក់លាក់គេអត់ហ៊ានឆ្លើយ គេថាឆ្លើយអត់ទាន់បានដោយសារ ជំនាញអត់ទាន់គូសប្លង់បានទំាងអស់ គេបញ្ជាក់ដែរថា កន្លងមកគេបានមានជំនាញគូសប្លង់រួចម្តងហើយ ប៉ុន្តែដ៏ទៅសិក្សានៅដីផ្ទាល់មានប្រជាពលរដ្ឋមួយចំនួនដែលគាត់កាន់កាប់នៅក្នុងដីហ្នឹង ចឹងបានគេដកមកវិញ ដើម្បីធ្វើសិក្សាឡើងវិញបញ្ជាក់ឲ្យបានច្បាស់»។
បើតាមតំណាងសហគមន៍ផ្លូវដែក អភិបាលរាជធានីភ្នំពេញលោក ប៉ា សុជាតិវង្ស ធ្លាប់សន្យាថានឹងធ្វើការអភិវឌ្ឍន៍ផ្លូវដែកនេះ មិនឲ្យពលរដ្ឋដែលរស់នៅជាប់តំបន់នោះ រងផលប៉ះពាល់ និងដាច់បាយនោះទេ។ ប៉ុន្តែពួកគេមិនមានជំនឿលើការសន្យារបស់អភិបាលរូបនោះទេ ដោយថា ការសន្យាមិនបានធ្វើជាលិខិតលាយលក្ខណ៍អក្សរ។
ទាក់ទិននឹងករណីនេះ តំណាងប្រជាសហគមន៍ផ្លូវរថភ្លើង អ្នកស្រីកែវ បុប្ផា បានព្រមានថា បើសាលារាជធានីភ្នំពេញមិនធ្វើតាមការសន្យាទេ អ្នកស្រីថាប្រជាសហគមន៍ទំាង៦នឹងតវ៉ារហូតមានដំណោះស្រាយ។
អ្នកស្រីព្រមានថា «ថ្ងៃមុនខ្ញុំបាននិយាយប្រាប់សាលាក្រុងហើយថា បើមិនឲ្យពួកខ្ញុំចូលឬមិនប្រាប់នូវអ្វីដែលត្រូវផ្លាស់ប្តូរពួកខ្ញុំទៅកន្លែងណាពិតប្រាកដជាក់លាក់ ពួកខ្ញុំនឹងមកកន្លែងហ្នឹង[មុខសាលារាជធានីភ្នំពេញ] ដាំបាយហូបកន្លែងហ្នឹង»។
VOD មិនអាចសុំការបំភ្លឺបន្ថែមពីអ្នកនាំពាក្យសាលារាជធានីភ្នំពេញលោក មាន ចាន់យ៉ាដា បានទេនៅថ្ងៃនេះ ដោយទូរសព្ទចូលច្រើនដងមិនមានអ្នកទទួល។
ប្រធានក្រុមការងារពិសេសសិទ្ធិលំនៅឋានលោក សៀ ភារម្យ យល់ថា បើមន្ត្រីរដ្ឋាភិបាលមិនធ្វើការដោះស្រាយបញ្ហានេះឲ្យមានតម្លាភាព នឹងធ្វើឲ្យពលរដ្ឋរិះគន់លើការដឹកនាំរបស់រដ្ឋាភិបាលដូចកាលពីអតីតកាលផងដែរ។លោកនិយាយថា «បើសិនជាយើងធ្វើឲ្យគាត់មានភាពរញ៉េរញ៉ៃ ហើយប្រជាពលរដ្ឋនៅតែចេញតវ៉ា ប្រជាពលរដ្ឋគេអាចចេញចោទប្រកាន់ថាអាជ្ញាធរមិនមានសមត្ថភាពក្នុងការដោះស្រាយបញ្ហា សុខមាលរបស់ប្រជាពលរដ្ឋ យើងគួរតែបញ្ចៀសបញ្ហាហ្នឹង យើងគួរតែធ្វើការអភិវឌ្ឍឲ្យមានការពេញចិត្តពេញថ្លើម ពីប្រជាពលរដ្ឋទៅ បានប្រជាពលរដ្ឋលោកមានការគំាទ្រ ឬក៏ស្រលាញ់រដ្ឋាភិបាល កុំឲ្យដូចអតីតកាល»។
តំណាងសហគមន៍ទំាងនោះបានលើកឡើងប្រហាក់ប្រហែលគ្នាថា ពួកគេបានយកញ្ញតិដាក់នៅសាលារាជធានីភ្នំពេញច្រើនដងមកហើយ តែមន្ត្រីស្ថាប័ននេះនៅតែពន្យាពេលមិនចង់ដោះស្រាយបញ្ហាជូនពួកគេនោះទេ។ តំណាងសហគមន៍ទំាងនោះថា ពួកគេនឹងនាំគ្នាមកជួបជុំគ្នារៀងរាល់១សប្តាហ៍ម្តង ដើម្បីជំរុញឲ្យមន្ត្រីស្ថាប័នខាងលើពន្លឿនដោះស្រាយបញ្ហាជូនពួកគេ។
គួរបញ្ជាក់ថា ដើមចមដែលនាំឲ្យពលរដ្ឋមានការព្រួយបារម្ភពីគម្រោងអភវិឌ្ឍន៍របស់សាលារាជធានីភ្នំពេញ នៅតាមបណ្តោយផ្លូវដែកនោះ ដោយពួកគេថា កន្លងទៅការអភិវឌ្ឍនៅក្នុងរាជធានីភ្នំពេញមានការបណ្ដេញពលរដ្ឋចេញពីលំនៅស្ថានមានដូចជា បឹងកក់ បុរីកីឡា ដីក្រហម សំបុកចាប ដោយបើកផ្លូវឲ្យក្រុមហ៊ុនចូលអភិវឌ្ឍ ហើយមកដល់ពេលនេះអ្នកខ្លះមិនទាន់បានសំណងនៅឡើយ៕
