ប្រធានាធិបតីបារាំង លោក ហ្វ្រង់ស័រ ហូឡង់ បានសន្យាកាលពីថ្ងៃស្រុកម្សិលមិញថា នឹងអនុវត្តទណ្ឌកម្មយ៉ាងតឹងរឹងទៅលើកូរ៉េខាងជើង ដែលកំពុងប្រឈមមុខនឹងការថ្កោលទោសនៅសប្ដាហ៍នេះ ដោយសារតែការព្យាយាមសាកល្បងគ្រាប់មីស៊ីលជាថ្មីម្ដងទៀតរបស់ប្រទេសមួយនេះ។
ទីភ្នាក់ងារព័ត៌មាន AFP បានរាយការណ៍ថា ការសន្យារបស់លោក ហូឡង់ កើតឡើងក្រោយជំនួបពិភាក្សាអស់រយៈពេល ១សប្ដាហ៍ជាមួយប្រធានាធិបតីកូរ៉េខាងត្បូង លោកស្រី Park Geun-hye នៅទីក្រុងប៉ារីស។
លោក ហូឡង់ ថ្លែងថា៖ «យើងនឹងធានាថា នៅក្នុងក្រុមប្រឹក្សាសន្តិសុខអង្គការសហប្រជាជាតិ ដែលបារាំងគឺជាសមាជិកអចិន្ត្រៃយ៍មួយ កូរ៉េខាងជើង នឹងរងទណ្ឌកម្ម ដោយសារយើងនឹងមិនអាចទទួលយកបាននោះឡើយ សូម្បីតែការគំរាមកំហែងតូចតាចចំពោះសុវត្ថិភាព និងសន្តិភាពតំបន់»។
លោក ហូឡង់ បានចាត់ទុកកម្មវិធីនុយក្លេអ៊ែរ និងគ្រាប់មីស៊ីលកូរ៉េខាងជើងថាជា«ការគំរាមកំហែង»។
កាលពីថ្ងៃពុធកន្លងមកនេះ ក្រុមប្រឹក្សាសន្តិសុខអង្គការសហប្រជាជាតិ បានគាំទ្រជាឯកច្ឆ័នចំពោះសេចក្ដីថ្លែងការណ៍មួយធ្វើឡើងដោយសហរដ្ឋអាមេរិក ដែលទាមទារឲ្យកូរ៉េខាងជើងដកខ្លួនពីសកម្មភាពនានាបន្ថែមទៀត ក្នុងនោះមានការសាកល្បងគ្រាប់បែកនុយក្លេអ៊ែរផងដែរ ដែលបានរំលោភទៅនឹងសេចក្ដីសម្រេចរបស់អង្គការសហប្រជាជាតិ។
សេចក្ដីថ្លែងការណ៍នោះបានរៀបរាប់ថា សមាជិកក្រុមប្រឹក្សាសន្តិសុខអង្គការសហប្រជាជាតិ ថ្កោលទោសយ៉ាងខ្លាំងក្លាទៅលើការសាកល្បងបាញ់គ្រាប់មីស៊ីលបរាជ័យកាលពីថ្ងៃអង្គារកន្លងមកនេះ និងការសាកល្បងកាលពីថ្ងៃទី២៧ និង២៨ ខែមេសាកន្លងមក ដែលរំលោភយ៉ាងធ្ងន់ធ្ងរទៅលើកាតព្វកិច្ចអន្តរជាតិរបស់កូរ៉េខាងជើង។
លោកស្រី Park ថ្លែងថា លោកស្រីបានស្វែងរកការគាំទ្រពីបារាំងក្នុងការរក្សាជំហរតឹងរឹងទៅលើកម្មវិធីផលិតគ្រាប់មីស៊ីល និងនុយក្លេអ៊ែររបស់កូរ៉េខាងជើង។ លោកស្រីបន្តថា៖ «កូរ៉េខាងជើង ត្រូវតែយល់ថា គ្មានជម្រើសណាក្រៅពីបោះបង់កម្មវិធីនុយក្លេអ៊ែររបស់ខ្លួននោះឡើយ»។
ក្រុមប្រឹក្សាសន្តិសុខអង្គការសហប្រជាជាតិ បានអនុម័តទណ្ឌកម្មដ៏តឹងរឹងមួយលើកូរ៉េខាងជើង បន្ទាប់ពីរដ្ឋឯកោមួយនេះបានសាកល្បងគ្រាប់បែកនុយក្លេអ៊ែរលើកទីបួនកាលពីខែមករាកន្លងមក និងការសាកល្បងគ្រាប់មីស៊ីលនាពេលថ្មីៗនេះ៕