សហរដ្ឋអាមេរិក បានរំលឹកខួបលើកទី ២៧ឆ្នាំ នៃការបង្ក្រាបរបស់អាជ្ញាធរចិនទៅលើការតវ៉ានៅទីលានធៀនអានមេន កាលពីឆ្នាំ១៩៨៩ ដោយអាមេរិកបានអំពាវនាវឲ្យក្រុងប៉េកាំងបញ្ចប់ការរំលោភសិទ្ធិមនុស្ស។
ទីភ្នាក់ងារព័ត៌មាន AFP រាយការណ៍ថា តែប៉ុន្មានថ្ងៃមុនការចាប់ផ្ដើមកិច្ចពិភាក្សាយុទ្ធសាស្ត្រអាមេរិក-ចិនប្រចាំឆ្នាំ ក្រសួងការបរទេសអាមេរិក បានជំរុញឲ្យចិនអនុញ្ញាតឲ្យមានការរំលឹកដល់ហេតុការណ៍បង្ក្រាបនោះ។
អ្នកនាំពាក្យក្រសួងការបរទេសអាមេរិក លោក Mark Toner បាននិយាយថា រដ្ឋាភិបាលអាមេរិកបន្តអំពាវនាវឲ្យបង្ហាញដោយពេញលេញជាសាធារណៈនូវតួលេខអ្នកស្លាប់ ជាប់ឃុំ ឬបាត់ខ្លួន។
រដ្ឋមន្ត្រីការបរទេសអាមេរិក លោក John Kerry និងរដ្ឋមន្ត្រីរតនាគារអាមេរិក លោក Jack Lew នឹងធ្វើដំណើរទៅប្រទេសចិននៅសប្ដាហ៍ក្រោយ សម្រាប់កិច្ចពិភាក្សាកម្រិតខ្ពស់មួយស្ដីពីទំនាក់ទំនងរវាងមហាអំណាចសេដ្ឋកិច្ចពិភពលោកទាំងពីរនេះ។
ប៉ុន្តែមន្ត្រីអាមេរិកនិយាយថា ទំនាក់ទំនងរវាងប្រទេសទាំងពីរ កំពុងឈរជើងរឹងមាំគ្រប់គ្រាន់សម្រាប់ឲ្យក្រុងវ៉ាស៊ីងតោន និយាយអំពីក្ដីបារម្ភរបស់ខ្លួនដោយមិនបង្កឲ្យមានបញ្ហានោះឡើយ។
លោក Toner បាននិយាយថា ចិនមានការផ្លាស់ប្ដូរជាច្រើន ចាប់តាំងពីថ្ងៃទី០៤ ខែមិថុនា ឆ្នាំ១៩៨៩ នៅពេលដែលរដ្ឋាភិបាលចិន បានបង្ក្រាបយ៉ាងហិង្សាទៅលើបាតុកម្មដោយសន្តិវិធី នៅកណ្ដាលទីក្រុងប៉េកាំង។
ទោះជាយ៉ាងណា អ្នកនាំពាក្យរូបនេះ បន្ថែមថា ក្រុងវ៉ាស៊ីងតោន បន្តមានក្ដីបារម្ភខ្លាំងលើការរំលោភសិទ្ធិមនុស្សកំពុងកើតមាននៅចិន ដោយលោកបានលើកឡើងពីការឃុំខ្លួនសកម្មជនសិទ្ធិមនុស្ស មេធាវី អ្នកកាសែត និងមេដឹកនាំសង្គមស៊ីវិល៕
