លោក កឹម សុខា ប្រធានគណបក្សសង្រ្គោះជាតិ បានទៅបោះឆ្នោតរួចហើយនៅម៉ោង១០ព្រឹកនេះ នៅការិយាល័យសាលាបឋមសិក្សាចាក់អង្រែលើ។
ឡោមព័ទ្ធដោយអ្នកសារព័ត៌មានរាប់រយនាក់ លោក កឹម សុខា បានឆ្លើយនឹងសំណួរអ្នកសារព័ត៌មានបណ្តើរ ដើរបណ្តើរ។ មេដឹកនាំគណបក្សប្រឆាំង បានវាយតម្លៃពីដំណើរការបោះឆ្នោតឃុំសង្កាត់អាណត្តិទី៤នេះ ថាមានលក្ខណៈល្អប្រសើជាងបោះឆ្នោតលើកមុនៗ៖ «រហូតមកដល់ថ្ងៃនេះ បើយើងប្រៀបធៀបនឹងអាណត្តិមុនវាប្រសើរជាង ហើយការបង្ហាញឆន្ទៈគំាទ្រ គណបក្សសង្គ្រោះជាតិ ក៏ច្រើនជាងមុនដែរ»។
លោកសង្ឃឹមថា នឹងបានសន្លឹកឆ្នោតច្រើនជាង៖ «យើងធ្វើ យើងមានគោលដៅ ក្តីសង្ឃឹមរបស់យើងមានហើយ ប៉ុន្តែយើងមានផែនការច្បាស់លាស់ វាអាស្រ័យលើប្រជាពលរដ្ឋ យើងបានកំណត់ផែនការរបស់យើងឲ្យលើសពី៦០ភាគរយ បើបានប៉ុន្មាននៅលើប្រជាពលរដ្ឋ»។
ការវាយតម្លៃដូចនេះទំនងលោក កឹម សុខា សំអាងលើ គ.ជ.ប ពេលនេះមានសមាសភាពស្មើគ្នាមកពីគណបក្សសង្រ្គោះជាតិ និងគណបក្សប្រជាជនកម្ពុជា បូករួមនឹងតំណាងអង្គការសង្គមស៊ីវិល។ កាលពីអាណត្តិទី៣ គណបក្សប្រជាជនកម្ពុជាមានមេឃុំ ចៅសង្កាត់សរុប១៥៩២។ ចំណែក គណបក្ស សម រង្ស៊ី មាន២២មេឃុំ និងគណបក្ស សិទ្ធិមនុស្សមាន១៨៕