មន្រ្តីរដ្ឋាភិបាលកម្ពុជាបានចាត់ទុកប្រទេសចិនថាជាអ្នកជួយឧបត្ថម្ភមិនអាចកាត់ផ្តាច់បានក្នុងការអភិវឌ្ឍប្រទេសកម្ពុជានាពេលបច្ចុប្បន្ននេះ។
រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានលើកឡើងនៅក្នុងជំនួបជាមួយឯកអគ្គរដ្ឋទូតចិន លោកស្រី BU Jiangu កាលពីម្សិលមិញថា៖ “ការជួយឧបត្ថម្ភ ការផ្តល់ប្រាក់កម្ចី ការលើកទឹកចិត្តឲ្យអ្នកវិនិយោគមកបោះទុន និងកិច្ចសហប្រតិបត្តិការទាំងនោះ បានរួមចំណែកដ៏សំខាន់ក្នុងការអភិវឌ្ឍរបស់កម្ពុជានាពេលបច្ចុប្បន្ន ហើយបានជួយពង្រឹងបន្ថែមទៀតនូវឯករាជ្យនយោបាយរបស់កម្ពុជា”។
ចិនបានផ្តល់ជំនួយឥតសំណងមកកម្ពុជាចំនួន៣៦០០លានយ័នស្មើប្រមាណជា៦០០លានដុល្លារសំរាប់រយៈពេល៣ឆ្នាំគឺ ឆ្នាំ២០១៦-២០១៨។ ការផ្តល់នេះបានលើកឡើងក្នុងជំនួបទ្វេភាគីរវាងលោក ហ៊ុន សែន និងនាយករដ្ឋមន្ត្រីចិន លី ខឹឈាង នៅប្រទេសម៉ុងហ្គោលីកាលពីថ្ងៃទី១៥ខែកក្កដាកន្លងទៅ។
គួរបញ្ជាក់ថាប្រធានរដ្ឋសភាកម្ពុជាលោក ហេង សំរិន បានដឹកនាំប្រតិភូជាន់ខ្ពស់រដ្ឋសភាទៅបំពេញទស្សនកិច្ចផ្លូវការនិងមិត្តភាពនៅសាធារណរដ្ឋប្រជាមានិតចិនរយៈពេល៥ថ្ងៃ ក្រោយពីចិនប្រកាសផ្តល់ជំនួយដល់កម្ពុជា ហើយនាយករដ្ឋមន្ត្រីចិនលោក លី ខឹឈាង គ្រោងនឹងមកធ្វើទស្សនកិច្ចនៅកម្ពុជានាពេលខាងមុខ៕
