វិភាគ៖ មូលហេតុនៅពីក្រោយការចាប់ខ្លួន លោក ញឹក ប៊ុនឆៃ

ដោយ លោក អុឹង ប៊ុនថន​​ | ថ្ងៃសុក្រ ទី៤ ខែសីហា ឆ្នាំ២០១៧​ ម៉ោង 3:38 PM | បទវិភាគ | 0 | 13965 ប្រធានគណបក្សខ្មែររួបរួមជាតិ លោក ញឹក ប៊ុនឆៃ កាលពីពេលកន្លងទៅ (រូបថត ហួត វុទ្ធី)

លោក ញឹក ប៊ុនឆៃ អាយុ៥៩ឆ្នាំ ដែលមានកំណើតនៅឃុំស្វាយចេក ស្រុកថ្មពួក ខេត្តបន្ទាយមានជ័យ គឺអតីតមេទ័ពកំពូលម្នាក់។ យោងតាមឯកសារ នៅឆ្នាំ១៩៧៦ លោកធ្លាប់ជាប់គុកនៅបន្ទាយទាហានអារញ្ញប្រថេតប្រទេសថៃ រយៈពេល៤ខែ។

នៅពេលមានព្រឹត្តិការណ៍ផ្ទុះអាវុធនៅភ្នំពេញ ថ្ងៃទី ៥-៦ ខែកក្កដា ឆ្នាំ១៩៩៧  លោក ញឹក ប៊ុនឆៃ បានធ្វើដំណើរដោយថ្មើរជើងរយៈពេលមួយខែទើបទៅដល់មូល​ដ្ឋាន​អូស្មាច់។

តាំងពីពេលនោះ រហូតដល់ពេលបោះឆ្នោតសកល ឆ្នាំ១៩៩៨ លោក ញឹក ប៊ុនឆៃ ជាមេចល​នា​តស៊ូនៅតំបន់ជាប់ព្រំដែនថៃ។ ប៉ុន្តែនៅដើមឆ្នាំ ១៩៩៩ លោក ញឹក ប៊ុនឆៃ បានត្រឡប់មកកាន់ទីក្រុងភ្នំពេញវិញ ព្រមទាំងទទួលបានការតែងតាំងជាអនុប្រធានទី២នៃព្រឺទ្ធសភា។

ក្រោយការបោះឆ្នោតសកលឆ្នាំ២០០៣ នៅគ្រាដែលជាប់គាំងខាងនយោបាយ លោក ញឹក ប៊ុនឆៃ គឺជាអ្នកបានចូលរួមដោះស្រាយវិបត្តិនេះ រហូតបានសម្រេចរៀបចំរាជរដ្ឋាភិបាលចំរុះទ្វេភាគី គឺគណបក្សប្រជាជនកម្ពុជានិងគណបក្សហ្វ៊ុនស៊ិនប៉ិច។

នៅថ្ងៃទី១៣ ខែកក្កដា ២០០៤ លោក ញឹក ប៊ុនឆៃ ក្នុងនាមជាប្រមុខរដ្ឋស្តីទីបានចុះហត្ថលេខា​លើច្បាប់រដ្ឋធម្មនុញ្ញបន្ថែម ដ៏ចម្រោងចម្រាស់ ខណៈដែលសម្តេចឪ នរោត្តម សីហនុ យាងចេញទៅចិន ហើយលោក ជា ស៊ីម ក្នុងនាមប្រមុខរដ្ឋស្តីទីក៏បានចេញទៅថៃទៀត ដែល​អ្នកវិភាគ​យល់ថាដើម្បីគេចចេញពីការចុះហត្ថលេខាលើច្បាប់រដ្ឋធម្មនុញ្ញបន្ថែម​។

ក្រោយពេលចុះហត្ថលេខាលើច្បាប់រដ្ឋធម្មនុញ្ញបន្ថែម លោក ញឹក ប៊ុនឆៃ ត្រូវបានតែងតាំង ជាឧបនា​យករដ្ឋមន្ត្រី និងជាសហរដ្ឋមន្ត្រី ក្រសួងការពារជាតិ ហើយត្រូវបានតម្លើងឋានន្តរៈសក្តិ ជានាយឧត្តមសេនីយ៍ផ្កាយមាស៤។
លុះដល់ថ្ងៃទី១៨ ខែតុលា ឆ្នាំ ២០០៦ លោក ញឹក ប៊ុនឆៃ បានដឹកនាំ ធ្វើការកំណែទំរង់ គណបក្សហ្វ៊ុនស៊ិនប៉ិច ដែលសម្តេចក្រុមព្រះចាត់ទុកថាជាការធ្វើបក្សប្រហារទម្លាក់ទ្រង់ពីព្រះ​ប្រ​ធាន​បក្ស​ ហើយ លោក ញឹក ប៊ុនឆៃ  បានកាន់កាប់តំណែងជាអគ្គលេខាធិការគណបក្សហ្វ៊ុនស៊ិន​ប៉ិច​។

តាំងពីពេលនោះមកគណបក្សរាជានិយមមួយនេះ បានចែកចានចែកឆ្នាំងគ្នាជាពីរបក្ស ដោយ​មួយ​ក្រុមនៅបន្តគាំទ្រលោក ញឹក ប៊ុនឆៃ និង​​មួយក្រុមទៀត​ដង្ហែតាមសម្តេចក្រុមព្រះទៅបង្កើតគណបក្សមួយដាក់ឈ្មោះទ្រង់ផ្ទាល់គឺគណបក្ស នរោត្តម រណឬទ្ធិ។

លទ្ធផលនៃការបែកបាក់ជាពីរនេះ បានធ្វើឲ្យគណបក្សដែលត្រូវបានបង្កើតឡើងដោយសម្តេច​​ព្រះនរោត្តម សីហនុ នោះនៅសល់តែម្នាក់ពីរកៅអីនៅក្នុងរដ្ឋសភា ក្រោយពេល​បោះឆ្នោត​​ឆ្នាំ២០០៨ ហើយមកនៅសល់សូន្យកៅអីនៅឆ្នាំ២០១៣។

មកដល់ពេលនេះ គណបក្ស ហ្វ៊ុនស៊ិនប៉ិច បានធ្លាក់ទៅក្នុងការ​គ្រប់​គ្រង​របស់​សម្តេច​ក្រុម​ព្រះ​វិញ ហើយ​លោក ញឹក ប៊ុនឆៃ ក៏ទៅបង្កើតគណបក្សថ្មីមួយទៀត ដាក់​ឈ្មោះថា គណបក្សខ្មែររួបរួមជាតិ។

លទ្ធផលនៃការបោះឆ្នោតឃុំ សង្កាត់ ឆ្នាំ២០១៧ គណបក្សខ្មែររួបរួមជាតិរបស់លោក ញឹក ប៊ុនឆៃ ទទួលបានមេឃុំ១ ហើយមានអសនៈក្រុមប្រឹក្សាសរុប២៤។ ចំណែកគណបក្សហ្វ៊ុនស៊ិនប៉ិចរបស់សម្តេចក្រុមព្រះ មិនទទួលបានមេឃុំឬចៅសង្កាត់ទេ តែបានអសនៈក្រុមប្រឹក្សាសរុប២៨​។

នៅថ្ងៃទី៣ខែមិថុនាឆ្នាំ២០១៧ ពោលគឺមុនបោះឆ្នោតមួយ​ថ្ងៃ លោក ញឹក ប៊ុនឆៃ បានទូរសព្ទទៅលោក អេង ឆៃអ៊ាង អនុប្រធានគណបក្សសង្រ្គោះជាតិ។ នេះជាការអះអាងរបស់ លោក អេង ឆៃអ៊ាង។

នៅ​ក្នុង​​កិច្ចសន្ទនាដែល​ត្រូវបានគេផ្សព្វ​ផ្សាយគឺ «លោក ញឹក ប៊ុនឆៃ បាន​ឲ្យអ្នកគាំទ្រលោកនៅខេត្តកំពង់ធំបោះឆ្នោតឲ្យគណបក្សសង្រ្គោះជាតិ»។ ក្រោយមក​លោកនាយករដ្ឋមន្រ្តី ហ៊ុន សែន ក៏បានទួលព្រះមហាក្សត្រឲ្យ​ដក​តំណែង​លោក ញឹក ប៊ុនឆៃ ចេញពីទីប្រឹក្សារដ្ឋាភិបាលដែលមានឋានៈស្មើនឹង​ឧបនាយក​រដ្ឋមន្រ្តី។ ប៉ុន្តែលោក ញឹក ប៊ុនឆៃ បានធ្វើសន្និសីទបកស្រាយថាលោកទូរសព្ទច្រឡំលេខទៅកាន់លោក អេង ឆៃអ៊ាង។

នៅថ្ងៃទី៣ខែសីហាឆ្នាំ២០១៧នេះ លោក ញឹក ប៊ុនឆៃ ត្រូវបានសមត្ថកិច្ចចាប់ខ្លួន នៅក្រោម​បទចោទថា ពាក់ព័ន្ធនឹងគ្រឿងញៀនតាំងពីឆ្នាំ២០១២។

អ្នកវិភាគនយោបាយ លោក សូ ចន្ថា លើកឡើងពីហេតុផលពីរយ៉ាង​ដែលឈាន​ទៅ​ដល់​ការ​ចាប់​ខ្លួន​លោក ញឹក ប៊ុនឆៃ។ លោកវិភាគថា «ទិដ្ឋភាពទី១ យើងក៏ធ្លាប់[ ឃើញ] មានការ លើកឡើងតាំងពីយូរណាស់ហើយករណីគ្រឿងញៀន កាលដែលលោកនៅជាគណបក្សហ្វ៊ុនស៊ិន​ប៉ិច។ វាអាចពាក់ព័ន្ធគ្រឿងញៀនមែន។ ប៉ុន្តែគ្រាន់តែពាក់ព័ន្ធក្នុង​កំរិតណាមួយ ខ្ញុំមិនច្បាស់​ទេ។ ចំណុចទី២ ខ្ញុំគិតថាវាពាក់ព័ន្ធរឿងនយោបាយជាពិសេសដំណាក់កាល​ចុង​ក្រោយ​ដែលលោក ញឹក ប៊ុនឆៃ ទូរសព្ទទៅអនុប្រធានគណបក្សសង្រ្គោះជាតិ»។

លោក សូ ចន្ថា យល់ថា ចំណាត់​ការ​ទៅលើ​លោក ញឹក ប៊ុនឆៃ បានឆ្លុះ​បញ្ចាំងឲ្យឃើញថា ការ​អនុវត្តច្បាប់នៅកម្ពុជាមានស្តង់ដាពីរ ដោយថា នៅពេល​អតីតឧបនាយករដ្ឋមន្រ្តីរូបនេះ​​ស្មោះ​ត្រង់​នឹងរដ្ឋាភិបាល គឺមិនត្រូវបានស៊ើបអង្កេត​រឿង​គ្រឿង​ញៀនទេ ប៉ុន្តែនៅពេល​ដឹងថា អតីតមេទ័ពរូបនេះចង់ងាកចេញពីរដ្ឋាភិបាលគឺចាត់ការឲ្យបានមុនតែម្តង។

លោក ចន្ថា វិភាគថា ​ការចាប់​ខ្លួន​លោក ញឹក ប៊ុនឆៃ នៅមុនពេល​បោះឆ្នោតមកដល់នេះគឺជាសញ្ញាព្រមានទៅអ្នកគាំទ្រ​គណបក្ស​កាន់​អំណាច​ កុំឲ្យងាកទៅគាំទ្រគណបក្សប្រឆាំង។ លោកយល់ថា «ខ្ញុំមើលទៅ[គំរាមទាំងសមាជិក]គណបក្សកាន់អំណាចនិងបក្សដែលជាដៃគូររដ្ឋាភិបាលផង។ បើយោងទៅលើ​លទ្ធផល​បោះឆ្នោត​យើងឃើញថា​សំឡេងអ្នកគាំទ្របក្សអំណាចហាក់ដូចជាធ្លាក់ចុះ។ មូលហេតុមានច្រើន ​ប៉ុន្តែមូលហេតុដែលសំខាន់ គឺសមាជិក​​របស់​ខ្លួន​ហ្នឹង​មិនបោះឆ្នោត​គាំទ្រ​គណបក្សរបស់​ខ្លួននោះទេ»។

លោក ឯម សុវណ្ណរ៉ា ​អ្នកវិភាគនយោបាយមួយរូបទៀតវិភាគថា ការចាប់ខ្លួនលោក ញឹក ប៊ុនឆៃ ជារឿងនយោបាយដោយ​ផ្អែកលើ​ការ​ផ្តាច់​សម្ព័ន្ធភាពជាមួយគណបក្សប្រជាជនកម្ពុជា ហើយ​ប្រកាសទៅធ្វើ​សមាជនៅពេលខាងមុខ ដែល​គេ​រំពឹងថាអាច​នឹងទៅ​រួបរួមជា​មួយគណ​បក្ស​ប្រឆាំង។ ប៉ុន្តែលោកយល់ថា ចំណាត់ការនេះមិនអាចទប់ស្កាត់​ចរន្តចាកចេញរបស់អ្នកគាំ​ទ្រ​​ផ្សេង​ទៀតបានឡើយ។

លោកយល់ថា «ចរន្តនេះពិបាក​ទប់​ស្កាត់​មិន​ឲ្យងាកចេញណាស់។ ពលរដ្ឋ​ឬអ្នក​នយោបាយ​អាច​មាន​សិទ្ធិ​ងាក​រក​បក្សផ្សេងបានហើយមានលទ្ធភាព បើសិនក្នុងយន្តការមួយវាខ្វះ​ឱកាស​ចាប់​យក​​លាភ​សក្តារៈនឹង​ធ្វើ​ឲ្យ​​អ្នក​ផ្សេងរត់​ទៅ​រក​បក្ស​ផ្សេងដែល​មាន​កម្លាំង​ជាង​ហើយ​ស្រប​នឹង​ចរន្ត​ពេល​វាលាដែលគណបក្សប្រឆាំង អំពាវនាវ​ចង់​ឲ្យអ្នក​ផ្សេង​ៗ​ចាក​ចេញពី គណបក្ស​កាន់​អំណាច»៕

សរសេរមកកាន់ លោក អុឹង ប៊ុនថន តាមរយៈ chanthorn@vodhotnews.com

Loading...

ចាប់អារម្មណ៍នឹងព័ត៌មានប្រភេទនេះ? ចុះឈ្មោះដើម្បីទទួលបានព័ត៌មានថ្មីៗ

Fields marked with an * are required