ស្ត្រីដែលគេស្គាល់ថា ជាមិត្តស្រីរបស់ខ្មាន់កាំភ្លើង បាញ់ប្រហារនៅទីក្រុង Las Vegas ដែលបានសម្លាប់មនុស្សអស់៥៩នាក់នោះបានធ្វើដំណើរដល់សហរដ្ឋអាមេរិកកាលពីល្ងាចថ្ងៃអង្គារម្សិលមិញ ហើយកំពុងស្ថិតនៅក្នុងការស៊ើបអង្កេត។
ស្ត្រីរូបនោះ ឈ្មោះ Marilou Danley ធ្វើដំណើរពីប្រទេសហ្វីលីពីនដល់សហរដ្ឋអាមេរិកនៅល្ងាចថ្ងៃអង្គារម្សិលមិញ ហើយត្រូវជួបជាមួយភ្នាក់ងារស៊ើបអង្កេតរបស់អាមេរិកភ្លាមៗ។ នេះបើតាមសារព័ត៌មាន BBC។
តាមការផ្សព្វផ្សាយឲ្យដឹងថា ខ្មាន់កាំភ្លើងជាមន្ត្រីចូលនិវត្តន៍ឈ្មោះ Paddock បានផ្ញើលុយឲ្យមិត្តស្រីរបស់លោកនៅក្នុងប្រទេសហ្វីលីពីនមុនថ្ងៃបាញ់ប្រហារកាលពីថ្ងៃអាទិត្យនោះចំនួន ១០០ ០០០ដុល្លារ។ បន្ទាប់មកបើកការបាញ់ប្រហារស្លាប់៥៩នាក់ របួសជាង ៥០០នាក់។
ប្អូនស្រី Marilou Danley ថ្លែងថា បងស្រីរបស់នាង មិនមានគម្រោងធ្វើដំណើរទៅហ្វីលីពីននោះទេ ប៉ុន្តែត្រូវបានខ្មាន់កាំភ្លើង Paddock ទិញសំបុត្រយន្តហោះនឹងតម្រូវឲ្យទៅហ្វីលីពីន។
ពេលនេះ សមត្ថកិច្ចហ្វីលីពីនកំពុងតែបើកការស៊ើបអង្កេតជុំវិញទឹកប្រាក់ចំនួន ១០០ ០០០ដុល្លារអាមេរិកនោះ ថា ពាក់ព័ន្ធអ្វីនឹងហេតុការណ៍បាញ់ប្រហារ។
ប្អូនប្រុសរបស់ខ្មាន់កាំភ្លើងថ្លែងថា បងប្រុសរបស់លោក គឺស្រលាញ់ និង ងប់ងល់ខ្លាំងជាមួយលោកស្រី Marilou Danley។
លោកស្រី Marilou Danley អាយុ៦២ឆ្នាំជនជាតិអូស្ត្រាលី កើតនៅក្នុងប្រទេសហ្វីលីពីន ហើយបានទៅរស់នៅសហរដ្ឋអាមេរិកតាមស្វាមី Geary Danley ហើយគាត់ក៏បានលែងលះគ្នានៅឆ្នាំ២០១៥។ បន្ទាប់មកលោកស្រីក៏មានទំនាក់ទំនងជាមួយលោក Stephen Paddock៕