យ៉ាងហោចណាស់ តំណាងរាស្ត្រគណបក្សប្រឆំាងជិត២០នាក់ បានចាកចេញពីកម្ពុជា និងគ្រោងចាកចេញពីកម្ពុជាបន្តទៀត ខណៈមានការព្រមានពីការចាប់ខ្លួន ពាក់ព័ន្ធនឹងសំណុំរឿងលោក កឹម សុខា។ នេះយោងតាមមន្ត្រីជាន់ខ្ពស់គណបក្សសង្គ្រោះជាតិ ដែលថ្លែងប្រាប់សារព័ត៌មានក្នុងស្រុក។
ថ្លែងប្រាប់វិទ្យុអាស៊ី កាលពីថ្ងៃទី៣ខែតុលា ម្សិលមិញ អនុប្រធានគណបក្សសង្គ្រោះជាតិ លោកស្រី មូរ សុខហួរ អះអាងថា បន្ទាប់ពីលោកស្រីចាកចេញពីកម្ពុជាភ្លាមៗថា បើគិតត្រឹមថ្ងៃទី៣ខែតុលា សមាជិកសង្គ្រោះជាតិជិត២០រូបហើយ បានចាកចេញពីកម្ពុជា ខណៈមន្ត្រីនិងសកម្មជនលេចធ្លោមួយចំនួនទៀត ក៏នឹងត្រៀមចាកចេញផងដែរ ដោយថា ពួកគេបារម្ភពីសុវត្ថិភាព និងការចាប់ខ្លួន ពាក់ព័ន្ធសំណុំរឿងលោក កឹម សុខា។
លោកស្រី មូរ សុខហួរ ថ្លែងថា លោកស្រី និងតំណាងរាស្ត្រមួយចំនួនទៀត ដែលចាកចេញពីទឹកដីកម្ពុជាទៅប្រទេសផ្សេងគ្នានោះ គឺដើម្បីបំពេញបេសកកម្មការងារ នឹងស្វែងរកដំដោះស្រាយពីអន្តរជាតិ ឲ្យជួយប្រទេសកម្ពុជា។
លោកស្រីថ្លែងប្រាប់អាស៊ីសេរីថា៖ «ខ្ញុំមួយនាក់មិនថ្វីទេ បើសិនជាមានតុលាការពិតប្រាកដ[ឯករាជ្យ] គ្មាននរណាគេខ្លាចទេ ព្រោះអត់មានអ្នកណាប្រព្រឹត្តអំពើខុសច្បាប់ ឬមួយក៏យើងជាជនក្បត់ជាតិ ក៏ប៉ុន្តែយើងឃើញថា អ្នកដែលចោទប្រកាន់យើង អ្នកដែលដឹកនាំប្រទេសយើងសព្វថ្ងៃ ហួសនិស្ស័យ និងការគិតហើយ គឺគិតតែពីឃើញសត្រូវពេញខ្លួនហើយ ជុំខ្លួនហើយ ដូច្នេះ នៅពេលដែលអ្នកនោះគិតតែពីឃើញថា ខ្មែរជាសត្រូវហើយគ្រោះថ្នាក់ណាស់»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោក មិនចាប់អារម្មណ៍និងការលើកឡើងរបស់មន្ត្រីបក្សប្រឆំាង លោកស្រី មូរ សុខហួរ នោះទេ។ ប៉ុន្តែ លោកថា កម្ពុជាបច្ចុប្បន្ននេះមានសុខសន្តិភាព សុវត្ថិភាព។ លោកថា មានតែអ្នកប្រព្រឹត្តខុសច្បាប់ទេ ដែលព្រួយបារម្ភពីសុវត្ថិភាពខ្លួនឯងនោះ។
លោកមានប្រសាសន៍ថា៖ «សភាពការណ៍នយោបាយអត់មានក្តៅទេ ក្តៅតែសម្រាប់អ្នកប្រឆំាងទេ ចំពោះគេ ទូទៅអត់មានក្តៅអី ជីវភាពសង្គមរបស់ប្រជាពលរដ្ឋ អត់មានរអាក់រអួលណា វានៅតែរលូនធម្មតា មានអ្នកណាគេចាប់អារម្មណ៍ និយាយពីបញ្ហាក្តៅក្រជាក់ដូចជាបក្សប្រឆំាងលើកឡើង នេះគាត់ភ័យខ្លាចសភាពការណ៍ នយោបាយក្តៅ វាពាក់ព័ន្ធតែរឿងគាត់ទេ គាត់មិនជ្រះស្រលះ មិនស្អាតស្អំ មិនត្រឹមត្រូវ ដូចប្រជាពលរដ្ឋទូទៅ មកពីគាត់ប្រព្រឹត្តល្មើសច្បាប់ហើយ បានគាត់មានការភ័យព្រួយដោយខ្លួនឯង»។
ចំពោះ សាស្ត្រាចារ្យនយោបាយលោក សូ ចន្ថា វិភាគថា ក្នុងស្ថានការណ៍បែបនេះ សមាជិកបក្សប្រឆាំងមិនត្រូវចាកចេញពីកម្ពុជានោះទេ ដោយថា តំណាងរាស្ត្រ និងសមាជិកទំាងនោះ គួររកវិធីជជែកគ្នា ជាមួយបក្សកាន់អំណាច តាមរយៈវប្បធម៌សន្ទនា ទើបដោះស្រាយ វិបត្តិនយោបាយនៅកម្ពុជា ឲ្យទទួលបានផលវិជ្ជមាន។
លោកយល់ថា៖ «ស្ថានភាពបច្ចុប្បន្នបក្សប្រឆំាង គួរប្រមូលផ្តុំគ្នា ជាពិសេសអ្នកតំណាងរាស្ត្រធ្វើការស្របទៅតាមអ្វីដែលជាតួនាទីភារកិច្ច ហើយជំរុញឲ្យមានការឈានទៅដល់ការជជែកគ្នា ដែលយើងហៅថាវប្បធម៌សន្ទនា ពីព្រោះថា ប្រសិនគ្មានវប្បធម៌ជជែកគ្នាទេ វប្បធម៌សន្ទនានោះទេ យើងហាក់ដូចជា មិនអាចស្វែងរកជំរើសណាមួយ ដែលធ្វើឲ្យខ្មែរ និងខ្មែរ អាចងាកមកតុជាមួយគ្នា ហើយជជែកគ្នាបាននោះទេ បើសិនជាខ្មែរយើងបន្ត បែកបាក់ផ្ទៃក្នុង នៅពេលនោះ យើងមិនអាចរកឃើញផ្លូវ មួយឲ្យមានសន្តិភាពពិតប្រាកដនោះទេ»។
រយៈពេលមួយខែ នៃការឃុំខ្លួនមេបក្សប្រឆាំងរូបនោះ មានប្រតិកម្មជាបន្តបន្ទាប់ពីប្រទេសលោកសេរីជាច្រើន ដោយ ពួកគេសម្តែងការព្រួយបារម្ភ និងជំរុញឲ្យមានការដោះលែង លោក កឹម សុខា ជាបន្ទាន់ ដើម្បីធានាពីដំណើរការលទ្ធិប្រជាធិបតេយ្យនៅកម្ពុជា។ ប៉ុន្តែ លោកនាយករដ្ឋមន្ត្រី ហ៊ុន សែន បដិសេធម្តង ហើយម្តងទៀតថា ការចាប់ និងឃុំខ្លួនមេបក្សប្រឆាំង ជាការអនុវត្តច្បាប់ ដើម្បីរក្សាសន្តិសុខ និងសន្តិភាពនៅកម្ពុជា។ លើសពីនេះទៀត លោក ហ៊ុន សែន បានថ្លែងជាបន្តបន្ទាប់ ដោយគំរាមចាប់ខ្លួនអ្នកពាក់ព័ន្ធសំណុំរឿងលោក កឹម សុខា ដែលលោកចោទថា ក្បត់ជាតិ នេះផងដែរ៕